Ислам асыл дініміз

Ассалаумағалейкум! Мен  Алла разылығы үшін шын жүректен, ойым басқа жақта болмайтындай, жылап, Алладан қорқып дірілдеп, барша жүрегіммен оқығым келеді, бірақ олай оқи алмай жүрмін, неге екенін білмеймін.  Ақыл  айтыңыздаршы, шын жүректен қалай намаз оқыған дұрыс?
2) Сосын дұға тілегенде қалай бастап, не тілеген жөн?
3) Екі ағамды осы айда Алла қаласа қысқы демалыста келгенде қалай болсада намаз оқуға көндіргім келеді, біріншіден оларға қандай уағыздан бастап, жүректерінің түбіне баратындай қандай сөздер айтсам болады?

Уағалайкум сәләм уа рахматтулахи уа баракатух!

1. Намазға бастарда Алланың құзырына шығамын,  мүмкін соңғы намазым шығар деп Аллаға шайтанның жаманшылығынан сыйыну керек.

2. Дұғада алдымен Аллаға мақтау кейін Пайғамбарымызға (с.ғ.с.) салауат айтып,  соңында ішіңіздегі қандайда тілегіңізді айтасыз.

3.  Дүниенің ағымы Аллаға тәуелді екенін, дүние ағып бара жатқан теңіздей.  Сол  судан адамдарды иманға құлшылыққа шығу керек екенін түсіндіру керек және көп-көп дұға жасау керек, оларды да Аллаһ тура жолға әкелсін деп. 

Әссәләму алайкум уә рахмәтуллаһи уә баракатуһ! Намаз оқып жатып сөздерінен қателессе не істейді? Намазды басынан оқи ма? Мен мысалы бесін намазының 4 рәкағат сүннетін оқып бітіп, парызын оқып жатканда сөздерінен қателессем,  4 рәкағат сүнетінен бастаймын ба? 

Ақбота 

Уағалайкум сәләм уа рахматтулахи уа баракатух!  Намаз сөздері, яғни мағынасы бұзылатындай болса қайта оқылады. Ал егер ракәғатта жаңылсаңыз ең азынан басталады.  Яғни  2-3 десеңіз 2 ден басталады. Бұл оқып жатқан намазға байланысты,  парызды оқысаңыз парызды,  сүннеті оқысаңыз сүннеті қайта оқисыз.

Банктен депозит аштыруға болады ма?

Ахмет

Уағалайкум сәләм уа рахматтулахи уа баракатух! Ғалымдар егерде байлықты сақтап қалу ниетімен болса болады деген,  бірақ пайызын садақа ретінде тарату керек деген.

Ассалямуалейкум! Кіші  дәреттен тазаланып,  яғни истинжа қылып, дәрет алып намазға тұрған кезде рукуғ, сәждеге иілгенде жыныс мүшеден кішкене мөлшерде зәр шықса намазды қайта оқиды ма? Және  сол ішкі киімі нәжіс болып есептеледі ме? 

Уағалайкум сәләм уа рахматтулахи уа баракатух! Дәрет те, намаз да бұзылады,  қайта дәрет алу керек. Шыққан нәжіс алақан мөлшерінен көп болса іш киім нәжіс болады,  ал,  оған жетпесе намазға рұқсат.

Нифас кезде нелере тиым, нелерге тиым емес?

Тұрсынай 

Нифас - әйел адам босанғаннан кейін пайда болатын қан. Мұның белгілі бір мерзімі жоқ. Ханафилер бойынша, Нифастың ең ұзақ уақыты - қырық күн. Умми Сәлама былай дейді: «Нифасты әйел Аллаһ Елшісі (с.а.у.) заманында қырық күн, қырық түн күтетін» (Әбу Дауд, Таһарат/119). Нифас мерзімінде Нифас қаны кейбір күндері тыйылып, сосын қайта жалғасса тыйылған бұл күндер де Нифас күндері болып саналады. Хайыз бен Нифас қандары тоқтаған кезде, ғұсылалу қажет. Аллаһ Тағала былай дейді: «(Мұхаммед) олар сенен етеккір жайында сұрайды. Оларға: Ол жиіркенішті нәрсе, етеккір кезінде әйелдеріңнен алыс тұрындар. Оларға тазарғанға дейін жақындаспаңдар. Қашан олар толық тазарса, оларға Аллаһтың өздеріне бұйырған жерінен жақындасыңдар де» («Бақара», 222-аят). Әйелдер мұндай кездерде намаз оқи алмайды. Ораза да ұстай алмайды. Бірақ оразаның қазасын кейін өтейді. Қажылық кезінде Қағбаны тауап ете алмайды (Бухари, Хайыз / 20). Құран оқи алмайды. Пайғамбарымыз: «Хайыз, жүніп болған әйел Құран оқи алмайды», - дейді (Тирмизи, Таһарат / 98). Ханафилер бойынша, мұндай кезде әйелдер Құранды жатқа дұға ниетінде оқуына болады. Сол секілді мешітке де кірулеріне болмайды. Бір хадисте былай айтылған: «Ешқандай хайыз әйел, жүніп кісі мешітке кіре алмас». Жыныстық қатынас та жасай алмайды. Аятта былай айтылады: «(Мұхаммед) олар сенен етеккір жайында сұрайды. Оларға тазарғанға дейін жақындаспаңдар де» (Бақара 2/222).[1]

«Ясин»  сүресі қай кезде окылады?

Талшын 

«Ясин» сүресінің қасиеті хадис шәрифтерде былай делінген:

«Әр түні Ясин сүресін оқуды әдет қылып, сол жағдайында қайтыс болған адам шәһид болады.»

«Құран кәрімде бір сүре бар, оқыған адамға шапағат етеді, ал тыңдағанның кешірілуіне себеп болады. Ахиретте қорыққанынан сақ болады. Бұл сүре – Ясин шәриф.»

«Өлім халінде жатқан аурудың қасында Ясин шәриф оқылатын болса, әрбір әрпі үшін бір періште келіп, рухының оңай шығуына дұға етеді. Жуындырғанда жанында болады. Табытымен бірге барады. Намазына, жерлеуіне де қатысады және әрдайым дұға етеді.»

«Шайтандар Ясин сүресінен, Хашр сүресінің соңғы бөлімінен және Муаууизәтәйн (Фәлақ, Нас) сүрелерінен қашады.»

«Мазарға кірген адам Ясин сүресін оқыса, сол күні мәйіттердің азаптары жеңілдейді. Ал оқыған адамға мәйіттердің санымен бірдей сауап беріледі.»

«Жанында Ясин сүресі оқылған науқас суға қанған күйде өледі және тойған күйде қабірге кіреді.»

«Мұсылман болған науқастың жанында Ясин шәриф оқылатын болса, Ридуан есімді періште науқасқа жәннат шәрбетін әкеледі. Суға қанған күйде жанын тапсырады. Тойған күйде қабірге кіреді. Суға мұқтаждығы болмайды.»

«Ясин оқыңдар. Бұл сүреде он берекет бар. Аш адам оқыса – тояды. Киімі жоқ адам оқыса – киім табады. Бойдақ оқыса – үйленеді. Қорқуда болған адам оқыса – сақ болады. Мұңды адам оқыса – көңіл-күйі көтеріледі. Жолаушы оқыса – сапарда жәрдем табады. Жоғалған нәрсе табылады. Науқас адам оқыса – шипа табады. Өлгеннің жанында оқылса – азабы жеңілдейді. Шөлдеген адам оқыса – суға қол жеткізеді.»

«Кімде-кім ата-анасының немесе екеуінен бірінің қабірін әр жұма сайын зиярат етіп, сол жерде Ясин оқып тұрса, Аллаһу та'ала оны Ясин сүресіндегі әріптердің мөлшеріндей кешіреді.»

«Құран кәрімнің жүрегі – Ясин. Сөзсіз бұл сүре дерттерге шипа. Кімде-кім Аллаһты және ахиреттіктерді ойлап Ясин оқыса, Аллаһ оны міндетті түрде кешіреді.

«Әр түні Ясин сүресін оқыған адам міндетті түрде шәһид болып өледі.»

«Жұма түндері Ясин сүресін оқыған адам таңды Аллаһу та'аланың кешіріміне қауышқан күйде қарсы алады.»

 

Ясин сүресінің пайдалары

Хадис шәрифте былай делінген:

«Құран кәрімде бір сүре бар, оған Аллаһ дәрежесінде «Азыйма» делінеді. Бұл сүрені оқыған адам қиямет күні көптеген адамдарға шапағат етеді. Бұл сүре – Ясин сүресі.»

Ясин сүресін оқудың біршама пайдалары:

1) Ажалы келмеген науқас шипа табады.

2) Ажалы келген науқас өлім азабын тартпайды.

3) Өлген кезде жәннат періштелерін көреді.

4) Адам қорыққан нәрсесінен сақ болады.

5) Мұқтаждар жәрдемші табады.

6) Аш адам тоқ болады. Яғни күтпеген жерден ризық келеді.

7) Сусыз қалған адам қанғанша дейін жететін су табады.

8) Бойдақтардың үйленуі оңай болады.

9) Киімі болмаған адам киім табады.

10) Жоғалған нәрсе табылады.

«Ясин» сүресін  жазып жіберуге мүмкіндіктеріңіз болады ма? 

Аса қамқор, ерекше мейірімді Алланың атымен бастаймын.

Иа Син. (1)

Терең сырлы Құранға серт. (2)

(Мұхаммед Ғ.С.) Шәксіз сен анық елшілерденсің. (3)

Тура жолдасың. (4)

Өте үстем, ерекше мейірімді Алла түсірген (Құран жолы). (5)

Аталары ескертілмей өздері кәперсіз қалған елге ескертуің үшін. (6)

Расында олардың көбі зиянына берілген қаулыға лайық болды. Сондықтан олар иман келтірмейді. (7)

Рас олардың мойындарына боғаулар салдық. Сонда ол, иектеріне дейін; сондықтан олардың бастары кекжиіп қалған. (8)

Олардың арттарынан да бөгет алдарынан да бөгет жасап, көздерін қаптадық. Олар көрмейді. (9)

(Мұхаммед Ғ.С.) Оларға ескертсең де ескертпесең де бәрі бір. Олар иман келтірмейді. (10)

Шын мәнінде сен, үгітке еріп, Рахманды көрмей-ақ қорыққан кісілерге ескерте аласың. Ал оларды жарылқау және құрметті сыйлықпен қуант! (11)

Рас Біз өліктерді тірілтеміз. Сондай-ақ олардың ілгері жіберген, кейін қалдырған нәрселерін жазамыз. Әр нәрсені ашық бір Кітапта түгендеп қойдық. (12)

(Мұхаммед Ғ.С.) оларға, елшілер келген кент халқын мысал көрсет. (13)

Оларға екі елші жібердік. Сонда олар екеуін жасынға шығарды. Үшінші елшімен қуаттадық. Сонда елшілер: “Рас сендерге елшіміз” деді. (14)

(Кент халқы): “Сендер біз сияқты ғана адамсыңдар. Сендерге Рахман, еш нәрсе жіберген жоқ. Сендер мүлде өтірік айтасыңдар” деді. (15)

(Елшілер): “Раббымыз біледі. Расында сендерге елшіміз.” (16)

“Бізге ашық түрде жалғастыру ғана міндет” деді. (17)

Олар: “Расында сендер себепті сәтсіздікке ұшырадық. Егер айтқандарыңнан қайтпасаңдар, әлбетте сендерді таспен атқылаймыз. Сондай-ақ сөзсіз сендер бізден жан түршігерлік қинау көресіңдер” деді. (18)

(Елшілер): “Сәтсіздіктерің өздеріңмен бірге (Өз қылықтарыңнан). Берілген үгітті ырым қыласыңдар ма? Олай емес. Сендер шектен шыққан елсіңдер” деді. (19)

Қаланың шетінен біреу жүгіріп келіп: “Әй қаумым! Елшілерге ілесіңдер” деді. (20)

“Сендерден ақы сұрамайтын кісілерге еріңдер. Олар тура жолда.” (21)

“Өзімді жаратқанға неге құлшылық қылмаймын? Және сендер де Соған қайтарыласыңдар.” (22)

“Одан өзге тәңірлер етіп алайын ба? Мүбада Алла маған зиян келтіргісі келсе, Олардың қолдаулары маған ешбір пайда бермейді де олар мені құтқара алмайды.” (23)

“Сөз жоқ, онда мен ашық адасуда боламын.” (24)

“Күдіксіз Раббыларыңа иман келтірдім. Енді маған құлақ салыңдар.”(25)

“Жаннатқа кір” делінді де ол: “Әттең! Елім білген болса еді;” (26)

“Раббымның мені жарылқап, ардақтылардан еткенін” деді. (27)

Одан кейін оның еліне, көктен бір әскер түсірмедік әрі түсіруші де емеспіз. (28)

Ол бір ғана дауыс еді. Сонда олар сөніп, жоқ болды. (29)

Өздеріне келген елшіні ұдайы мазақ қылған құлдарға нендей өкініш! (30)

Олардан бұрын қаншалаған нәсілдерді жоқ еткенімізді; олардың бұларға қайтып келмейтінін көрмей ме? (31)

Біртұтас барлығы алдымызға жиналады. (32)

Оларға өлі жер; бір белгі. Оны жандандырып, одан дән шығарамыз да сонда олар одан жейді. (33)

Сондай-ақ онда құрмалардан, жүзімдерден бақшалар қылып, онда бастаулар ағыздық. (34)

Оның жаратқан өнімінен әрі өздері қолекі істеген нәрселерінен жесін. Сонда да шүкір қылмай ма? (35)

Сондай пәк Алла, барлық нәрсені жұп-жұбымен жаратты. Мейлі ол жердің өсірген нәрселерінен болсын, мейлі өздері өндірген және тағы білмегендерінен болсын. (36)

Оларға түн бір белгі. Одан күндізді ажыратамыз. Сонда олар, қараңғылықта қалады. (37)

Сондай-ақ күн белгіленген көлемінде жүреді. Міне осы аса үстем, әр нәрсені білуші Алланың өлшеуі. (38)

Тағы айдың орындарында өлшеп қойдық. Ескі құрманың қураған бұтағындай болғанға дейін. (39)

Күннің айға жетуі мүмкін емес. Және түн де күндізден ілгерлемейді. Әрбірі көкте жүзеді. (40)

Олардың нәсілдерін толы кемеде (Нұх кемесінде) тасуымыз, олар үшін бір белгі. (41)

Әрі олар үшін сол сияқтыдан мінетін көліктер жаратуымыз (да бір белгі). (42)

Қаласақ, оларды суға батырамыз. Сонда оларға болысушы да жоқ, олар құтқарылмайды да. (43)

Бірақ Біздің тарапымыздан бір мәрхамет және бір мерзімге дейін пайдалану болады. (44)

Қашан оларға: “Алдарыңдағы және арттарыңдағы жағдайлардан сақтаныңдар. Әрине мәрхаметке бөленесіңдер” делінсе; (45)

Сондай-ақ оларға Раббыларының белгілерінен бір белгі келсе-ақ олар одан жалтарады. (46)

Қашан оларға: “Алланың сендерге берген несібесінен тиісті орынға жұмсаңдар” делінсе, сондай қарсы болғандар: “Алла қаласа, тамақтандыратын біреулерді біз тамақтандырамыз ба? Сендер мүлде адасқансыңдар” деді. (47)

Олар: “Егер шын айтсаңдар, бұл құқайларың қашан?” дейді. (48)

Олар таласып тұрғанда, оларды қолға алатын бір-ақ ащы дауыс күтіп тұрады. (49)

Сонда олар өсиет айта алмайды да үйлеріне де қайта алмайды. (50)

Сүр үрілсе, сонда олар қабырларынан Раббыларына жүгіреді: (51)

“Әттең-ай, бізді жатқан жерімізден кім тұрғызды?”,-дейді. “Міне мейірімді Алланың уәдесі. Пайғамбар да шын айтқан” (делінеді). (52)

Бір ғана айғай болады да сонда тұтас алдымызға әзір болады. (53)

Ал енді бүгін ешкімге зұлымдық етілмейді. Сондай-ақ істегендеріңнің ғана бодауын көресіңдер. (54)

Расында жаннаттықтар, ол күні зауықты шұғылдануда болады. (55)

Олар да, жұбайлары да көлеңкелердегі дивандарға жастанған түрде болады. (56)

Олар үшін онда жемістер және өздеріне не тілегендері бар. (57)

Ерекше мейірімді Раббыларынан оларға: “Сәлем” сөзі болады. (58)

“Әй күнәкарлар! Бүгін араны ашыңдар!” (59)

Әй адам баласы! Сендерге: “Шайтанға табынбаңдар. Әрине ол, өздеріңе ашық дұшпан” деп, серт бермедім бе? (60)

“Маған құлшылық қылыңдар. Тура жол осы!” (61)

Расында ол, сендерден көптеген топты адастырды. Сонда да түсінбейсіңдер ме? (62)

Сендерге уәде етілген тозақ осы. (63)

Қарсы келулерің себепті бүгін оған кіріңдер. (64)

Ол күні олардың ауыздарын мөрлейміз. Бізге олардың қолдары сөйлеп, не істегендеріне аяқтары айғақ болады. (65)

Мүбада қаласақ, олардың көздерін мүлде соқыр қылар едік те сонда олар жол іздесе, қайтып көрер еді? (66)

Егер қаласақ, олардың мекендерінде әлбетте бейнелерін өзгертер едік. Сонда олар ілгері де кейін де кете алмас еді. (67)

Әлде кімге өмір берсек, жаратылыста оны қайта бастырамыз. Олар түсінбей ме? (68)

(Мұхаммед Ғ.С. ға) өлең үйретпедік әрі оған ол, лайық емес. Ол, бір үгіт және ашық Құран ғана. (69)

Тірі кісілерге ескерту, қарсы болғандарға байланысты сөз шынға шығу үшін. (70)

Олар үшін рас құдыретімізбен хайуандарды жаратқанымызды көрмей ме? Сондай-ақ өздері оларға иелік етеді. (71)

Малды, оларға бойсұндырдық. Олар кейіне мінеді, кейінің етін жейді. (72)

Олар үшін малдарда түрлі пайдалар, сусындар бар. Сонда олар шүкірлік қылмай ма? (73)

Олар Алладан өзге тәңірлер жасап алып, олардан көмек көретіндіктерін үміт етеді. (74)

Олар (пұттар), оларға көмек ете алмайды. Олардың өздері ол пұттарды қорғау үшін әзір әскер. (75)

(Мұхаммед Ғ.С) олардың сөздері сені кейітпесін. Әрине Біз олардың көрнеулерін де, көместерін де білеміз. (76)

Адам баласы өздерін бір тамшы судан жаратқанымызды көрмей ме? Сонда да ашық қиқарлық істейді. (77)

Олар өз жаратылысын ұмытып, Бізге мысал берді: “Міне шіріген сүйектерді кім тірілтеді?”,- деді. (78)

(Мұхаммед Ғ.С.): “Оны, сондай алғаш жаратқан тірілтеді. Ол, барлық жаратылысты біледі” де. (79)

Ол сондай Алла, сендерге жасыл ағаштан от жаратты. Сол уақытта сендер оны жағасыңдар. (80)

Сондай көктер мен жерді жаратқан Алла, олар сияқтыны жаратуға күші жетпей ме? Әлбетте күші жетеді. Ол, әр нәрсені жаратушы, толық білуші. (81)

Шын мәнінде Ол, бір істің болуын қаласа, Оның бұйрығы оған “бол” деу. Сонда ол бола қалады. (82)

Барлық нәрсенің билігі қолында болган әрі сендер Соған қайтарылатын Алла; кемшіліктен пәк. (83)

Бисмилләһир Рахманир Рахиим
(1) йа син
(2) уәлқурәнил хәкиим
(3) иннәкә ләминәл мурсәлиин
(4) ъалә сирәтим мустәқиим
(5) тәнзииләл ъазиизир рахиим
(6) литунз̃ирә қаумәм мә унз̃ирә әбәуһум фәһум ғафилуун
(7) ләқад хаққал қаулу ъалә әкс̃әриһим фәһум лә йу'минуун
(8) иннә жәъалнә фии әънәқиһим әғләлән фәһийә иләл әз̃қани фәһум муқмәхуун
(9) уәжәъалнә мин бәйни әйдииһим сәддәу уәмин халфиһим сәддән фәәғшәйнәһум фәһум лә йубсируун
(10) уәсәуәун ъаләйһим әәнз̃әртәһум әм ләм тунз̃ирһум лә йу'минуун
(11) иннәмә тунз̃иру мәнит тәбәъаз̃ з̃икрә уәхашийәр рахманә билғайби [cалә] фәбәшширһу бимәғфирәтиу уәәжрин кәриим
(12) иннә нәхну нухиил мәутә уәнәктубу мә қаддәмуу уәәс̃әрәһум [жим] уәкуллә шәйин әхсайнәһу фии имәмим мубиин
(13) уәдриб ләһум мәс̃әлән әсхәбәл қарйәти из̃ жәәһәл мурсәлуун
(14) из̃ әрсәлнә иләйһиму с̃нәйни фәкәз̃з̃әбууһумә фәъаззәзнә бис̃әлис̃ин фәқалуу иннә иләйкум мурсәлуун
(15) қалуу мә әнтум иллә бәшәрум мис̃лунә уәмә әнзәләр рахману мин шәйин ин әнтум иллә тәкз̃ибуун
(16) қалуу раббунә йәъләму иннә иләйкум ләмурсәлуун
(17) уәмә ъаләйнә илләл бәләғул мубиин
(18) қалуу иннә тәтаййәрнә бикум [cалә] ләил ләм тәнтәһуу ләнәржумәннәкум уәләйәмәссәннәкум миннә ъаз̃әбун әлиим
(19) қалуу таирукум мәъакум [жим] әин з̃уккиртум [жим] бәл әнтум қаумум мусрифуун
(20) уәжәә мин әқсал мәдиинәти рәжулун йәсъа қалә йә қаумит тәбиъуул мурсәлиин
(21) иттәбиъуу мәл лә йәсәлукум әжрәу уәһум муһтәдуун
(22) уәмә лийә лә әъбудул ләз̃ии фәтарәнии уәиләйһи туржәъуун
(23) әәттәхиз̃у мин дууниһи әлиһәтән ий йуриднир рахману бидуррил лә туғни ъаннии шәфәъатуһум шәйәу уәлә йунқиз̃уун
(24) иннии из̃әл ләфии даләлим мубиин
(25) иннии әмәнту бираббикум фәсмәъуун
(26) қиилә дхулил жәннәтә [cалә] қалә йә ләйтә қаумии йәъләмуун
(27) бимә ғафәрә лии раббии уәжәъаләнии минәл мукрәмиин
(28) уәмә әнзәлнә ъалә қаумиһи мин бәъдиһи мин жундим минәс сәмәи уәмә куннә мунзилиин
(29) ин кәнәт иллә сайхәтәу уәхидәтән фәиз̃ә һум хамидуун
(30) йә хәсрәтән ъаләл ъибәд [жим] мә йә'тииһим мир рәсуулин иллә кәнуу биһи йәстәһзиуун
(31) әләм йәрәу кәм әһләкнә қабләһум минәл қурууни әннәһум иләйһим лә йәржиъуун
(32) уәин куллул ләммә жәмииъул ләдәйнә мухдаруун
(33) уәәйәтул ләһумул әрдул мәйтәту әхйәйнәһә уәәхрәжнә минһә хәббән фәминһу йә'кулуун
(34) уәжәъалнә фииһә жәннәтим мин нәхиилиу уәәънәбиу уәфәжжәрнә фииһә минәл ъуйуун
(35) лийә'кулуу мин с̃әмәриһи уәмә ъамиләтһу әйдииһим [cалә] әфәлә йәшкуруун
(36) субхәнәл ләз̃ии халәқал әзуәжә куллаһа миммә тунбитул әрду уәмин әнфусиһим уәмиммә лә йәъләмуун
(37) уәәйәтул ләһумул ләйлу нәсләху минһун нәһәрә фәиз̃ә һум музлимуун
(38) уәшшәмсу тәжрии лимустәқаррил ләһә [жим] з̃әликә тәқдиирул ъазиизил ъалиим
(39) уәлқамәрә қаддәрнәһу мәнәзилә хәттә ъадә кәлъуржуунил қадиим
(40) ләш шәмсу йәнбәғии ләһә ән тудрикәл қамәрә уәләл ләйлу сәбиқун нәһәр [жим] уәкуллун фии фәләкий йәсбәхуун
(41) уәәйәтул ләһум әннә хәмәлнә з̃урриййәтәһум фиил фулкил мәшхуун
(42) уәхаләқнә ләһум мим мис̃лиһи мә йәркәбуун
(43) уәин нәшә' нуғриқһум фәлә сарииха ләһум уәлә һум йунқаз̃уун
(44) иллә рәхмәтәм миннә уәмәтәъан илә хиин
(45) уәиз̃ә қиилә ләһумут тәқуу мә бәйнә әйдиикум уәмә халфәкум ләъалләкум турхәмуун
(46) уәмә тә'тииһим мин әйәтим мин әйәти раббиһим иллә кәнуу ъанһә муъридиин
(47) уәиз̃ә қиилә ләһум әнфиқуу миммә рәзәқакумуллаһу қаләл ләз̃иинә кәфәруу лилләз̃иинә әмәнуу әнутъиму мәл ләу йәшәуллаһу әтъамәһу ин әнтум иллә фии даләлим мубиин
(48) уәйәқуулуунә мәтә һәз̃әл уәъду ин кунтум садиқиин
(49) мә йәнзуруунә иллә сайхәтәу уәхидәтән тә'хуз̃уһум уәһум йәхиссимуун
(50) фәлә йәстәтииъуунә тәусийәтәу уәлә илә әһлиһим йәржиъуун
(51) уәнуфиха фиис суури фәиз̃ә һум минәл әждәс̃и илә раббиһим йәнсилуун
(52) қалуу йә уәйләнә мән бәъас̃әнә мим мәрқадин [қалә] һәз̃ә мә уәъадәр рахману уәсадәқал мурсәлуун
(53) ин кәнәт иллә сайхәтәу уәхидәтән фәиз̃ә һум жәмииъул ләдәйнә мухдаруун
(54) фәлйәумә лә тузләму нәфсун шәйәу уәлә тужзәунә иллә мә кунтум тәъмәлуун
(55) иннә әсхәбәл жәннәтил йәумә фии шуғулин фәкиһуун
(56) һум уәәзуәжуһум фии зиләлин ъаләл әрәики муттәкиуун
(57) ләһум фииһә фәкиһәтуу уәләһум мә йәддәъуун
(58) сәләмун қауләм мир раббир рахиим
(59) уәмтәзуул йәумә әййуһәл мужримуун
(60) әләм әъһәд иләйкум йә бәнии әдәмә әл лә тәъбудууш шәйтанә [cалә] иннәһу ләкум ъадууум мубиин
(61) уәәни ъбудууни [жим] һәз̃ә сирәтум мустәқиим
(62) уәләқад әдаллә минкум жибиллән кәс̃иирән [cалә] әфәләм тәкуунуу тәъқилуун
(63) һәз̃иһи жәһәннәмул ләтии кунтум тууъадуун
(64) исләуһәл йәумә бимә кунтум тәкфуруун
(65) әлйәумә нәхтиму ъалә әфуәһиһим уәтукәллимунә әйдииһим уәтәшһәду әржулуһум бимә кәнуу йәксибуун
(66) уәләу нәшәу ләтамәснә ъалә әъйуниһим фәстәбәқуус сирәта фәәннә йубсируун
(67) уәләу нәшәу ләмәсәхнәһум ъалә мәкәнәтиһим фәмә стәтаъуу мудиййәу уәлә йәржиъуун
(68) уәмән нуъаммирһу нунәккисһу фиил халқи [cалә] әфәлә йәъқилуун
(69) уәмә ъалләмнәһуш шиърә уәмә йәнбәғии ләһ [жим] ин һууә иллә з̃икруу уәқурәнум мубиин
(70) лийунз̃ирә мән кәнә хәййәу уәйәхиққал қаулу ъаләл кәфириин
(71) әуәләм йәрәу әннә халәқнә ләһум миммә ъамиләт әйдиинә әнъамән фәһум ләһә мәликуун
(72) уәз̃әлләлнәһә ләһум фәминһә рәкуубуһум уәминһә йә'кулуун
(73) уәләһум фииһә мәнәфиъу уәмәшәрибу [cалә] әфәлә йәшкуруун
(74) уәттәхаз̃уу мин дууниллаһи әлиһәтәл ләъаллаһум йунсаруун
(75) лә йәстәтииъуунә нәсрәһум уәһум ләһум жундум мухдаруун
(76) фәлә йәхзункә қаулуһум [мим] иннә нәъләму мә йусирруунә уәмә йуълинуун
(77) әуәләм йәрәл инсәну әннә халәқнәһу мин нутфәтин фәиз̃ә һууә хасиимум мубиин
(78) уәдарәбә ләнә мәс̃әләу уәнәсийә халқаһу [cалә] қалә мәй йухиил ъизамә уәһийә рәмиим
(79) қул йухииһәл ләз̃ии әншәәһә әууәлә мәррәтин [cалә] уәһууә бикулли халқин ъалиим
(80) әлләз̃ии жәъалә ләкум минәш шәжәрил әхдари нәрән фәиз̃ә әнтум минһу тууқидуун
(81) әуәләйсәл ләз̃ии халәқас сәмәуәти уәләрда биқадирин ъалә әй йәхлуқа мис̃ләһум [жим] бәлә уәһууәл халләқул ъалиим
(82) иннәмә әмруһу из̃ә әрәдә шәйән әй йәқуулә ләһу кун фәйәкуун
(83) фәсубхәнәл ләз̃ии бийәдиһи мәләкууту кулли шәйиу уәиләйһи туржәъуун

Ассалаумағалайкум!  Қазіргі уақытта шам намазының уақыты қысқа. Мен жұмыстан шыққанда уақыты кіреді. Ауылдан қатынап жұмыс  істеймін. Үйге барғанша уақыты шығып кетеді. Жолда көлікте ишарамен оқимын.  Қаншалықты дұрыс? 

Жомарт 

Уағалайкум сәләм уа рахматтулахи уа баракатух! Ишарамен оқу үшін отырып оқылады, тұрып тұрып оқылмайды. Мүмкін болмаса үйге барғаннан кейін бірінші шам намазын, кейін құптан намазын оқысаңыз болады.

Ғұсылым жоқ.  Сапардамын.  Пойызда таяммум алып оқысам болады ма?

Ермек

Рұқсат.  Бірақ,  ең бірінші ғұсыл алу  мүмкіндігі болғанда таяммум бұзылады.

Дұшпандыққа қарсы және одан  үстем болу  дұғасы дегеніміз не?

Нұрсәуле

Дұшпан деген сізге қарсы неше түрлі жағдай жасаған адам. Оған үстем болу деген оған қарсы оқылатын дұға.