Мен түсімде мешіт көремін. Құран кітап оқып отыр екенмін. Енді өзім қатты намаз оқығым келіп жүр. Бірақ, бастай алмай жүрмін. Неге екенін білмеймін. Маған көмектесіп жіберіңіздерші.

Нұрлан  

Түс көргенде Аллаһ Тағаладан жақсы болса орындалуын, жаман болса жамандығынан сақта деп дұға жасалуы керек. Жақсылық болсын. Орталық медресеге келіп сабақ алсаңыз болады.

Құбыланы қалай ажыратуға болады?

Айгерім 

Құбыла Орта Азия бойынша күн Батыс жағында орналасқан. Қазір телефондағы компас арқылы көрсеңіз болады.

«Charli Hebdo» журналының  шығарған карикатурасы  жайында не дейсіздер? Жауапсыз қалдыруға болады ма? Қашанға дейін өзімізді басындырып қоймақпыз?   Олар біздің жанымыздан артық жақсы көретін Пайғамбарымызға (с.а.у.) тіл тигізсе.  

Олардың іс әрекеттері жақсылық емес. Аллаһ Тағаладан жақсылығы үшін дұға жасайық.

Жұма намазының оқулы тәртібін айтып жіберсеңіз. Қандай сүрелер оқылады?  

Данияр  

Жұма намазы 4 р сүннет, 2 р парыз, 4 р сүннет болып бекітілген. Өзіңіздің жадыңызда болған  сүрелер қосылады.

Сапар намазы туралы толық түсiнiк берсеңіздер екен? Таң, бесін, аср, ақшам, құптан, үтір уәжіп намаздарына тоқтап өтіңізші.

Гүлнұр 

Сапар дегеніміз тұрғылықты жерден жолаушы деп аталатындай түрде орын ауыстыру.  Дінімізде сапарда болған адамдар төрт ракағаттық парыз намаздарды екі ракағатқа қысқартып оқуына, Рамазан айында болса ораза тұтпай, басқа күндері қазасын өтеуіне, үш тәулікке дейін мәсіге масих тартуына рұқсат етіледі.

Міне, көріп отырғанымыздай жолға шыққан жолаушы төрт ракағаттық парыз намаздарды екі ракағат етіп оқылуы тиіс. Бұл жайлы Абдуллаһ ибн Омар былай дейді: «Мен Алла елшісі (с.а.с) және Әбу Бәкір (р.а), Омар (р.а) және Османмен (р.а) сапарда бірге болатынмын. Олар сапарда екі ракағатқа ешнәрсені қоспаған» (Бухари 1051). Бұл жердегі «...Екі ракағатқа ешнәрсені қоспаған...» дегені төрт ракағаттық намаздарды, екіге қысқартып, оларды төртке толтырмай оқыған дегенді білдіреді.

Сапардағы мұсылманның намаздарды қысқартып оқуы – Алланың құлдарына деген ерекше сыйы, мейірімділігі және жеңілдігі. Бұл тек төрт ракағаттық парыз намаздарға ғана қатысты яғни бесін, асыр құптанды қысқартасыз. Сондықтан, таң намазы мен ақшам намаздарының парызы мен үтір уәжіп намазықысқартылмайды.

Менің анам намаз оқыған.  Мен де қосылып оқитынмын.  Ол  кезде мен 9-10 жаста едім.  Бірақ кей жағдайға байланысты анам намазын қойып жүр. Мен де содан кейін  намазға бет бұрған емеспін.  Брақ қазір тек қана дұға оқып жүрмін.  Ал енді менің сұрағым мынау: мен жақында дұғалардың  арасында дәретханаға кіргенде және шыққанда «Ғуфранак» деп оқылатын  дұға бар екен. Мен анама айтқанда анам оның мағынасын сұраған да мен «кешірім» деп жауап бердім,  бірақ анам мен әкем ондай дұға жоқ, ол адасушылардың  шығарғаны дейді. Сол рас па, расында да мен  сол дұғаларды оқып жүріп қателікке бой алдырып жүргенім бе, сонда айтынызшы?

Жанар  

«Ғуфранак» дегеннің мағынасы «Аллаһым мені кешіре гөр» деп дұға ету. Оны өз тіліңізде айтсаңызда әбестігі жоқ.

Менің екі сұрағым бар: біріншісі - араб тілін қазақ әріптерімен тез үйренесің деген рас па? Екіншісі - сақал қойып едім, сол жайлы нақты Құраннан нақтылау бар ма?

Нұрболат 

1. Араб әрпін арап әрпімен үйренеді. Себебі, қазақ тілінде болмаған әріптер де бар. 2. Сақал қою сүннет амалына жатады,  яғни Пайғамбарымыз  (с.а.у.) қойған. Әдемілеп,  көркемдікпен қойсаңыз болады.

Намазды бастауға ниет етіп жүр едім, қазір жамағатпен мешітте жұма намаз оқып жүрмін. Тек  сүрелер мен аяттарды қате айтудамын, соған көмектессеңіздер, онлайн сілтемесін берсеңіздер (өзімнің тапқаным тура  ма жоқ па білмеймін), сіздер діни сауаттысыздар ғой, сондықтан нақты және тура жолын ұсынсаңыздар?

Нұрболат 

Уағалайкум сәләм уа рахматтулахи уа баракатух.Сайтымызда құран оқылудың аудиомәліметтер бөліміне кірсеңіз болады.