Ассәламуғалейкум, құрметті имам! Сізге қояр сұрағым адыраспанды үйде жағады, сол нәрсе дұрыс па? Осының шығу тарихын айтып берсеңіз? Аллаһ разы болсын! 

Әділет

Құрметті, Әділет мырза, халқымыз дәрілік шипасы мол деп санаған шөптердің бірі -   адыраспан. Біздің ата-бабаларымыз оны үйдің босағасына іліп қоятын болған. Жын-шайтаннан сақтайды деп сенген. Әрине, адыраспан жын-шайтаннан сақтайды деу исламға қайшы түсінік екені анық. Дегенмен оның емдік шипасын жоққа шығаруға болмайды. Тұмау өршіген кезде үйді адырспан түтінімен ыстау - тұмау микроптарының жойылуына себеп болады. Адыраспан шөбінен дайындалған тұнбаларды біздің қазақ түрлі науқастарды емдеуге пайдаланған. Мәселен, адыраспан тұнбасымен ішкі мүшелерге суық тигенін, малярия, безгек, мерез ауруларын жазып емдеген. Тіпті оның түтінімен сал ауруын емдеген жағдайлар да болған. Бұрынғы уақытта адыраспанды ішек құртты түсіруге пайдаланған. Ауылшаруашылығындағы зиянкестермен күресте адыраспан ерітіндісі пайдаланылған.
Міне адыраспанның пайдасы осылай тізбектеле береді. Бірақ оны түтету Аллаға серік қосу деп қателесуге болмайды. Алла тағаланың емдік шипаларының бір тармағы осындай шипалы шөптерде жасырулы жатқанын ұмытпағанымыз жөн.

Исламдағы ер мен әйелдің құқықтары қалай?

Қуаныш

Құрметті Қуаныш мырза, Ислам діні отбасылық ғұмырдың баянды болуына тікелей әсер ететін міндеттерді ер мен әйелге мықтап жүктеген. Ислам жанұяның бақытты болғанын қалайды. Ал осы жанұяда тепе-теңдік, үйлесімділік сақталуы үшін ер мен әйелге өзіндік жауапкершіліктерді жүктеген. Әйелдің  ері алдындағы міндеттері:
1. Күйеуінің ар-намысын, абыройын қорғауы.
2. Күйеуінің мал-мүлкін, тіпті туысқанына беріп жібермей қорғауы.
3. Перзенттеріне тәрбие беруі.
4. Күйеуінің келісімінсіз, тіпті өз туысы болса да үйіне кіргізбеуі.
5. Қажет жағдайда болмаса, күйеуінің рұқсатынсыз үйден шықпауы.
6. Егер күйеуі Аллаға қарсы келмейтін болса, оған толықтай бағынуы.
7. Аяғы ауыр кезде және баласын емізу кезінде сабырлық көрсетуі.
8. Күйеуі айтқан сырларды өзгеге жарияламауы.
9. Күйеуінің ашуын тудыратын іс-әрекеттерге бармауы.
10. Күйеуі сырттан (жұмыстан, сапардан т.б.) келгенде күлімдеп қарс алуы.
11. Күйеуіне шамасы жетпейтін ұсыныс айтпауы.
12. Күйеуінің ата-анасына құрмет көрсетуі. Алайда әйел оларға құрақ ұшып қызмет етуге міндетті емес. Қызмет етсе, нұр үстіне нұр.
13. Күйеуінің көңіліне жақпайтын сөздерді айтудан сақтануы.
14. Күйеуі төсекке шақырса (үзірлі жағдайлардан тыс) міндетті түрде баруы.
Әйел жоғарыда айтылған жауапкершіліктерді орындауға міндетті. Лайықты түрде орындаса, нағыз салихалы әйелге айналады. Сонымен қатар, кез келген іске епті, пысық болса, екі дүниеде де күйеуіне бақыт сыйлайды.
Ерінің әйелі алдындағы міндеттері:
1. Ер азамат әйелінің тіл тигізгеніне сабырлықпен қарап, оған сөз қайтармауы.
2. Әйелін тура жолға тәрбиелеу.
3. Адал аспен қамтамасыз ету.
4. Бала тәрбиесінде әйеліне жәрдемдесу. Мұның барлығы да еркекке парыз етілген.
5. Әйелі өзіне ұнамайтын бір іс істеп қойса, қателіктерікне түсіністікпен қарауы.
6. Етеккір кезінде және жүктілік кезеңдерінде мүмкіндігінше оны шаршатпауға және тынықтыруға тырысу.
7. Әйел айтқан сырларды басқа жария етпеу. Бұл міндетті атқару екі жаққа да парыз.
8. Әйелі діндар және көркем мінезді болса, соның құрметіне, болар-болмас қателіктеріне кешіріммен қарауы.
9. Әйелінің кішігірім шатақ мінездеріне  сабырлық көрсету.
10. Әйелін сөкпеуі, жазғырмауы, кемішіліктерін бетіне баспауы.
11. Әйеліне жылы сөздерін арнап, тек жақсы сөз айтуы.
12. Әйеліне діни міндеттерді, әсіресе парыз-уәжіптерді үйретуі.
13. Әйелі өзін төсекке шақырғанда көңілі соқпаса да, әйелінің бір тілегін орындап жіберуі.
Пайғамбарымыз (с.а.у.): «Бес уақыт намазын оқыған, парыз оразасын тұтқан, етек-жеңін жапқан және күйеуіне бағынған әйел кісі жәннатқа кірді» деп айтқан екен. Бұл хадисте «жәннатқа кіреді» деп тұрған жоқ, «кірді» деп нақты айтып отыр. Дәл осындай әйелдер шейіттердің сауабына ие болады.