Ассәламуғалейкум! Осы қазақта бір жаңа затқа көз тимесін деп қызыл шүберек байласа, балаға қара күйе жағады. Бұлардың барлығы сол, көз тиіп кетпесін деген қауіптен туындаса керек. Менің білгім келгені, осы әрекет шариғатқа қарсы емес пе?

Уағалейкум ассәлам! Қазақтың көп ырымдары Аллаһқа серік қосу болып табылады. Шариғатта көз тиюден сақтайтын дұғаларды айтып жүрсе жеткілікті.

Ассәламуғалейкум! Мен азаңнан кешке дейін жұмыстамын. Азаңда жұмысқа барарда таң намазымды оқып кетемін, кей кезде үйге түскі асқа келгенімде бесін намазымды оқып кетемін. Бірақ, көбінесе бесін, екінті, ақшам намаздарым қаза болып кетеді. Қояйын деген сұрағым қаза намаздар оқыла ма, әлде таһәжуд намазымен өтеле ме?

Уағалейкум ассәлам! Біріншіден, намаздарды қаза қылмауға әрекет ету керек. Қаза болып қалған жағдайда алдымен қаза намаздардың фарыздарын оқып, кейін құптан намазын оқу керек.

Ассәламуғалейкум! Сіздерге мың алғыс, сұрақтарымның жауабын біле алдым. Мен білім алу үшін басқа жамағаттармен  араласуыма тура келді.  Әрине, дұрысын таңдап, теріп, қатесін сарапқа салуға тырыстым. Дегенмен, Камили Муршидке сену  ақидаға теріс келе ме? Софыларда үлкен ұстаздарды осылай атайды. Олар Пайғамбарымыздан бүгінге дейінгі ұстаздарды санайды. Жалпы ұстазға бағыну, әулие кісілердің құрметіне Алладан дұға тілеудің үкімі қандай?

Уағалейкум ассәлам! Камили Муршидке сену ақидаға теріс келеді.  Себебі, мұсылман үмметі үшін Камили Муршид  Пайғамбарымыз (с.а.у.) болады.  Алладан дұға тілегенде, ортаға біреуді яғни, ұстаз, әулиелерді қойып дұға сұрауға шарт емес. Өйткені, дұғаларды толық қабыл етуші, жауап беруші Алланың  жалғыз өзі бәріне қадір.  Біреуді ортаға қойып дұға істеуге Аллаһ мұқтаж емес әрі қажет емес.

Үйде ит асырауға бола ма?

Үй ішінде және пәтерлі үйде ит ұстауға болмайды. Пағамбарымыздың  (с.а.у.) хадисі бойынша, үйге рахмет періштелері кірмейді.  Итті аулада асырауға болады. 

Менің бір танысым жақында өзімен рулас қызбен отбасын құрды. Айтуларынша, арамыз жеті атадан асып кеткен болады дейді.  Ал маған өте ерсі көрінеді. Бұл жайлы шариғатта айтылған ба? Қазақы ұғымда ше?

Шариғатта туған бауырларға және өте жақын туыстарға үйленуге болмайды.  Бір рудан болған қызға үйленуге болады. Пайғамбарымыз (с.а.у.) бір атадан тараған рулас ағасының баласына (Әлиге (р.а.))  қызын (Фатима (р.а.)) тұрмысқа берді.  Бірақ, біздің қазақтың салтында жеті атаға қарайды. Әке-шеше рұқсат берсе,  үйленуге болады.  Шариғатта оған ешқандай тыйым жоқ.  

Дәрет алғанда мәсіх тартып, кейін мәсіні шешсе дәрет бұзылады ма?

Мейірбек

 Құрметті, Мейірбек мырза, егер мәсіх тартып болған соң мәсіні шешсеңіз, мәсіх бұзылады. Аяғыңыздың басым бөлігін мәсіңіздің қонышына дейін шығарсаңыз  - толықтай шешілген болып есептеледі. Ондай кезде дәретіңіз болса, тек аяқтарыңызды жуып намаз оқуыңызға болады.

Ассәламуғалейкум, құрметті имам мырза! Келесі жұма айтылатын уағыздың тақырыбын алдын-ала қоясыздар ма? Олай болмаса, ислам мен ғылымның байланысы жайлы айтсаңыз. Аллаһ разы болсын!

Ақтөре

Уағалейкум ассалам, Ақтөре мырза. «Һибатулла Тарази» мешітінде жұма уағыздары әр аптаға бекітілген арнайы тақырып бойынша жүргізіледі.

Ассәламуғалейкум! Жақын арада бес уақыт намазды бастап едім. Бильярд ойынын достарыммен ойнап тұрсам болады ма? Рахмет.

Уағалейкум ассалам! Аллаһ намазыңызды қабыл етсін! Жалпы, ислам діні адамның денсаулығына, асыл уақытын зиян келтірмейтін спорттың қай-қайсысына болсын қарсы емес. Спорт ойындары адам денсаулығының мығым болуына әсер ететінін ғылым әлдеқашан мойындаған. Ал адамға пайдалы істерді Ислам әлдеқашан әмір етіп қойған Құран, хадистерде.
Бильярдқа келсек, егер ол құлшылық етуге, сауапты істерді жасауға кедергі болмаса, ислам бұйырған әмірлер өрескел бұзылмаса, бильярд ойнауға рұқсат. Бильярд ойыны жайдан-жай тасты таяқпен ұра салатын ойын емес. Ол адамның қырағылығын, ептілігін талап етеді. Сондықтан бильярд спорттың бір түріне жатады. Бильярд ойынына ақша тігілетін болса, онда харамға жатады. Исламда ақша тігіліп ойналатын ойынның қай-қайсысы да харам болып саналады. Бильярд ойынының бір ерекшелігі,  бильярд ойынында бірінші, адам ойланып, дәлдеп, көздеп тұрып, содан кейін нақты әрекетке көшеді. Ал құмар ойынында керісінше, адам әуелі әрекет етіп, кейіннен нәтижесі қалай болар екен деп ойланып, мүмкіндікті дәмете бастайды. Осыған қарап бильярд ойынын құмар ойындарына жатпайтынын байқаймыз. Бірақ мына төмендегі шарттардың табылғаны жөн:
1. Ақша тігілмеуі керек.
2. Ойын барысында бірін-бірі балағаттауға, күш көрсетуге, намысқа тиер сөздер айтуға болмайды.
3. Ойнаушы адам бильярдың кесірінен өзінің басты міндеті саналған құлшылық етуін, білім алуын, жанұя тәрбиесін ұмыт қалдыруға болмайды.
Дегенмен, асыл уақытымызды мүмкіндігінше құлшылықпен өткізу, бәрінен де қайырлы екенін ұмытпайық, қысқа ғұмырымызды сауапты істерге арнайық. Намаздың спортқа бергісіз теңдессіз құлшылық екенін есімізден шығармайық.