Ассалаумағалейкум имам ағалар! Менің сұрағым: Қызылорда облысынан тәуіп бала шығыпты. Ербосын Серікбаев деген. Жасы 11-де дейді. Осы баладан хабарларыңыз бар ма? Жалпы қалай емдейді? Осы кісілер жайлы шариғатта не дейді?

Уағалейкум сәләм уа рахматуллахи уа баракатух! Тәуіптердің көбі адасқан, дұрыс емес. Шариғатта орны жоқ. Көпшілігі жын-шайтанмен байланыста болады. Ал Құранның сүрелерімен емдесе, дем салса болар. 

Намазды жасырын оқуға болады ма?

Күнімай

Құдайға шүкір, тұғырлы тәуелсіз арқылы дінімізге, тілімізге қол жеткіздік. Намазды себепсіз жасырын оқуға болмайды. Жаудан қорықса, өміріне қауып төнсе жасырын оқиды.

«Хашр» сүресінің соңғы 3 аятын жазып жібересіздер ме?  Интернеттен таппадым.

Бекжан 

 

Хадис шәрифте: «Таң намазы мен ақшам намазынан кейін Хашр сүресінің соңғы үш аятын оқыған адам шәhид болып өледі» деп айтылған. Ол сондай Алла, Одан басқа ешбір тәңір жоқ. Көместі де көрнеуді де біледі. Сондай-ақ Ол, тым есіркеуші, ерекше мейірімді. Ол сондай Алла, Одан баска ешбір тәңір жоқ. Ол патша; Өте Пәк, есендік беруші, қорғаушы, тым үстем, аса өктем, өте зор. Алла олардың қосқан ортақтарынан пәк. Ол Алла, жаратушы, жоқтан бар етуші және бейнелеуші. Аттардың ең  көркемі Оған тән. Көктер мен жердегі әр нәрсе Оны дәріптейді. Ол, өте үстем, Аса дана. 

Мен сіздерден ақыл, кеңес сұрайын деген едім және бұны құпия ретінде сақтауларыңызды өтінемін. Мен білмеймін бұл сұрағыма сіздерден кім жауап беретінін, бірақ маған қажет, өзім ойлай беріп, тіпті шаршап кеттім. Бұл менің болашақ өміріме қатысты. Әрине қыз бала болып өмірге келгеннен кейін аяулы жар, мейрімді ана болуымыз бәрімізге парыз. Маған 7 жылдан бері бір жігіт ғашық, әлі қыр-соңымнан қалмай келеді. Өзі Аллаға сенетін, өмірге құштар, сабырлы адам. Ол жайлы ата-анам алдында білген болатын, сосын оған хабарласып қызымызды мазалама деген болатын, мағанда онымен хабарласпа деп айтқан болатын. Мен онымен солай 1,5 жылдай хабарласпадым. Енді  ол осы күндері маған хабарласып,  қайтадан сөз салып жүр. Енді ол туралы ата-анама айтсам олар менің ойымша қарсы болатын сияқты. 

Балқия 

Сонша жылдан бері сізді сүйіп күтіп сөз салып жүрген жігіт болса әрине екінші (тоқалдыққа) емес шығарсыз. Екінші болсаңыз кейінірек қиналып қаласыз. Бірінші асыл жар сүйікті болсаңыз ата-анаңызға айтып менің тағдырым, көңілім ауып тұр, рұхсат беріңіздер деп айтыңыз. Өзіңіз айта алмасаңыз,  жаңыңызға жеңгеңіз, жақсы туысыңызбен айтыңыз. Адамның тағдырын байлауға болмайды. Мүмкін болса,  жатар алдын 2 бас  намаз оқып, дұға жасаңыз. Оқи алмасаңыз, жатар алдында тек дұға жасаңыз. «Аллаһым маған қайырлысын болашақ өмірімнің жақсылығын ......... бере гөр», - деңіз. Алла жеңілдігін берсін!

Үнді кинолары және махаббат жайлы сериалдар көру харам ба?

Бауыржан 

Ашық-шашық,  ұятты  киноларды көруге тиым салынады. Болмайды.

Жеті атаға дейін үйленуге,  отбасы құруына тиым салған, бірақ жеті атадан асса үйленуге болады деген де сыбыс бар.  Медицина жағын білмедім.  Сіздер бұл сауалыма не дейсіздер?  

Саят

Дінімізде ер кісіге үйленуге болмайтын әйелдер қауымын екі категорияға бөліп қарастырады:

1. Өмір бойы бір-бірімен үйленуге болмайтындар:

• Жақын туған-туыстары. Олар: аналары мен әжелері; бірге туған әпке-қарындастары және  олардың қыздары мен немерелері; Сонымен қатар, әкесі не шешесі бөлек әпке-қарындастары және  олардың қыздары мен немерелері де үйленуге болмайтын кісілер қатарында;  бірге туған немесе әкесі бір, шешесі бөлек, не шешесі бір әкесі бөлек аға-інілерінің де қыздарымен және немерелерімен некелесе алмайды. Сондай-ақ, әке жағынан ағайын әпке-қарындастарымен және нағашы әпке-қарындастарыменде үйленуге болмайды. 
• Сүт бауырлары: Әйелдің  туған баласы туысқандарынан кімге үйлене алмаса, сол секілді сүт емген бала да олармен некелесе алмайды. Айта кететін маңызды нәрсе, «сүт бауырлыққа» байланысты үкімдер тек сол емшек емген балаға ғана қатысты. Оның (әлгі сүт анадан ембеген) аға-інілеріне және әпке-қарындастарына қатысы жоқ.
• Құдандалы туыстар[مُصَاهَرَة)  : Қайын аналары мен әжелері; өгей қыздары мен олардың қыздары және немерелері; өгей ұлдарының қыздары мен немерелері; өз ұлдарының әйелдері мен немерелерінің әйелдері (келіндері);  өгей аналары.

2.  Уақытша үйленуге болмайтындар: Бұл категориядағы кісілермен некелеспеу – уақытша кедергілерге сүйенеді. Кедергілер жойылысымен, некелесу құқы туындайды. Олар:

• Өзгенің некесіндегі әйелдер. Бір әйел ерімен ажыраспайынша немесе одан жесір қалмайынша өзге еркекпен некелесе алмайды.
• Иддәт мерзіміндегі әйелдер. Күйеуінен жесір қалған әйел немесе ажырасқан әйелөзге ерге тұрмысқа шықпай тұрып, белгілі бір мерзім күтеді. Бұны шариғатта «иддәт мерзімі» дейді.  Аталмыш мерзімі бітпей, тұрмысқа шығуына тыйым салынады.
• Апалы-сіңлілі екеуін бір некеде ұстау. Ағайындас апалы-сіңлілерді бірге бір некеде ұстау –харам. Ағайындас апалы-сіңлілер деп мыналарды атауға болады: бірге туған әпке-сіңлілері; әке жақтан әпке-сіңлілері;  нағашы әпке-сіңлілері;  аға-әпкелерінің қыздары  .     
• Төрт әйелі бар кісі – бесінші әйелді ала алмайды. Оны алу үшін, некесіндегі біреуін талақ етуі шарт. Себебі, шариғатта ең көбі  - төрт әйел ғана алуға рұқсат берілген.
• Үш талақпен ажырасқан әйел.
• Өзге діндегі қыз. Бір мұсылман жігіттің өзіне жар еткісі келген қызы – мұсылман   немесе христиан не яһуди дініндегі  қыз болуы тиіс. Бұлардан өзге діндегілерді алуына рұқсат жоқ.   

Ал, мұсылман қыз  тек мұсылман жігітке тұрмысқа шыға алады. Өзге діндегілерге күйеуге шығуы тыйым салынады  Өйткені әйел өз еріне тәуелді. Мұсылман емес ері, әйелдің әлсіздігін пайдаланып, оның наным-сеніміне кері әсерін тигізіп, намаз, ораза сияқты діни амалдарын орындауға кедергі жасайды. Оның үстіне дүниеге келген ұрпақтары өзге діндегі әкесінің дініне өтетіні мәлім. Бұл – Исламның мұсылман ұрпағын көбейту түсінігіне теріс. Өйткені ардақты Пайғамбарымыз (с.а.у):«Үйленіңдер және көбейіңдер! Қиямет күні үмметімнің көптігімен мақтанамын», – деген.

Қорыта келе айтарымыз,  «Ел боламын десең, бесігіңді түзе» - демекші өркениетті қоғамды құрайтын басты фактор - баянды отбасы. Оның баяндылығы мен беріктігі кейбір мәселелерге мән берудің арқасында туындайды. Соның бастапқы қадамы – пәк неке, таза ұрпақ алып келу. Оған қол жеткізу үшін Ұлы жаратушы Иеміздің пенделеріне міндеттеген үкімдеріне аса мән беруіміз керек.Ал жеті ата дегеніміз өз қарындасыңдай қара деген мәселе.және медецинада қан тазару керек немесе неше түрлі мүгедектер дүниеге келеді делінген.

Маған мешітіміздің ұстазы «Бисмиллахир рахманир рахим» деп айту керек Құран оқыганда, ал сол мешіттің  басқа ұсазы «Бисмиллахир рохманир рохим» деу керек деді. «Бисмиллахир рахманир рахим» деп айту қате, дурыс емес деді. Ал басқа ұстазым дұрыс деді. Неге ұстаздар бір-бірінен өзгешелеу сабақ береді? 

Бауырым, араб тілінде «О» деген әріп жоқ. Арабтар «о» деп оқымайды,  дегенімен «о» деп оқығанда мағына бұзылмайды. Әріптер жіңішке және жуан оқылады,  жуан әріптерден кейін кейбіреулер «о» деп оқиды. Жіңішкеде  «ә» деп оқиды. Еш  мағына бұзылмайды.

Менің анам өте көп күнә жасады,мен анамның тозаққа барғанын қаламаймын... Анам үшін бәрін істеймін, бірақ не істеу керегін білмеймін... Не істеуге болады анамды жәннатқа кіргізу үшін?

Ислам 

Пайғамбарымыз (с.ғ.с.): «Жәннәт аналарыңыздың аяқ астында» деген. Ата анаңыздың маңдайлары сәждеге келсін деп уағыз және дұға жасаңыз. Сәтін салып намазға келсе жәннәттық болар. Күнәлары таудай үлкен болса да, кешіруші жарылқаушы бір Аллаһ тағала.