Саламатсыздар  ма!  Қияметке  дейін  өлген  адамдардың  барлығы  қабірде ұйықтағандай  жатады ма,  әлде қайтыс  болған  адамдардың  рухы  ұшып  жүреді  ме? Бізді  ата -бабамыздың  рухы  қолдай  ма? Үйлерде  домовой  бар  деп  жатады ғой. Бұл не, рух па,  әлде  шайтан ба? Жауаптарыңыз  үшін алдын  ала  рахмет.

Айсұлу 

Сәлеметсіз бе, Айсұлу! 1. «Рух» деген сөз араб тілінен жан деген мағынаны білдіреді. Әруақ деген көпше түрі «жандар» дегенді білдіреді. Дүниеден өткен адамдардың рухтары (жандары) ешкімді қолдамайды, себебі өзі қабір әлемінде сұрақтармен әлек болып жатады. Қияметке дейін өлген адамдардың барлығы қабірде ұйықтағандай жатады еш қайда ұшып жүрмейді. Сұраққа тартылады. 2 Үйлердегі домовой деген нәрселер олар жындар мұсылман және кәпір болып екіге бөлінеді. Үй таза болса зияны болмайды.

Салематсіз бе! Барша мұсылманға Алла Тағала жар болсын! Сізден сұрайын дегенім 7 шелпек туралы не айтасыздар?

Гаухар 

Сәлеметсіз бе, Гаухар!  Садақаның түрлері көп. Жеті шелпек те соның ішіне кіреді.  Садақа  ретінде таратылса шариғатқа еш кедергісі жоқ.

Ассалаумағалейкум! Негізі осы негізі осы намазхандарға қызбен жүруге, сөйлесуге болады ма?

Бекарыс

Уағалейкум сәләм уа рахматуллахи уа баракатуһ! Шариғатта бөтен әйелдермен, қыздармен себепсіз сөйлесуге тыйым салынған. Сіз қызбен некелесуді ойлап, немесе таңдаған жағдайда ғана болады.

Сәлеметсіздер ме! Менің тісімде пломба бар бірақ дәрет алып намазымды оқып жүрмін. Тісте пломба болса алынған дәрет қабыл болады ма?

Айдана

Сәлеметсіз бе!Тісі түсіп немесе шіріп кеткенде тіс салуы немесе қаптауына рұқсат. Ғұсылғада, дәреткеде еш кедергісі жоқ. Дәретіңізді жалғастыра бересіз.

Сәлеметсіздер ме! Студент болғандықтан сабақтан үйіме жеткенше бесін намазының уақытын өткізіп аламын, сосын екінті намазынан соң қаза етіп оқимын. Екінті намазынан соң бесін намазын қаза етіп оқығанда екінті намазында Әттәхият, Аллахумма салли, Аллахумма бәрәк, сәлем беріп болған соң бірден орнымнан тұрып қаза намазды бастай бергенім дұрыс па? Жоқ әлде, Әттәхият, Аллахумма салли, Аллахумма бәрәк, сәлем берілген соң намаздан соң оқылатын дұғаларды түгел оқу керек па?

Айдана

 

Сәлеметсіз бе, Айдана! Қаза намаздары және нәпіл намаздары 3 уақыттың сыртында кез келген уақытта оқылады.
1 Күн шыққанан кейін 45 минут;
2 Бесін намазына 45 минут қалғанда;
3 Шам намазына 45 минут қалғанда намаздарды оқу мәкрух амалы. Бірінші екінті намазын толық бітіріп сәлем бересіз. Кейін тұрып қаза болған бесін намазына деп бастайсыз. Екеуі екі бөлек намаз.

Әссәләму әлейкум! Ырымға сену дұрыс па? Ол деген шариатта бар ма? Бойтұмар деген ширк па, оны тағу дұрыс амал бола ма? Үшінші сұрағым хиджаб кию парыз ба?

Елдос

Уағалейкум сәләм уа рахматуллахи уа баракатуһ, Елдос бауырым! Адам табиғаты естіген, көрген нәрселерінен бір мағына шығарып, оны жорамалдауға құмбыл тұрады. Жақсы нәрсе естіп немесе көңіліне хош нәрсені көрген сәтте оны жақсылыққа жорамалдаса, ұнамсыз сөз естіп, жағымсыз нәрсе көрген кезде оларды жамандыққа ырымдай бастайды. Міне сондықтан пайғамбарымыз (с.а.у.) «Ешбір адам үш нәрседен: жорамалдау мен күдікті ойдан, қызғаныштан құтыла алмайды» деп, адам баласының осы табиғатын білдірген. Бірақ нағыз мұсылман мұндай сезімдерге жол берместен барлық істерінде Жаратқанға тәуекел етеді. Пайғамбарымыз (с.а.у.) жоғарыдағы хадистің жалғасында: «Көңіліңе келген ырымға иек артпай, жолыңды жалғастыр, қызғанышың сыр берсе, оны шектен шығарма, ойыңа күдікті ой оралса, оны ақиқатқа айналдырып, жүзеге асырма!» деп көңілге түскен ырымды негізге алып, жолдан қайтуға, яки бастаған істі тастауға болмайтындығын ескерткен.
Міне, сондықтан Алла елшісі: «Ырым жасап, оған иек арту – ширк. Алайда Алла ырымды тәуекелмен жояды» деп ырымдаудың күнә екенін әрі тәуекел арқылы одан құтылуға болатындығын білдірген.
Тұмар тағу дегеніміз – түрлі қауіптен қорғайды деп, өзіңді-өзің жұбату ғана, психологиясы әлсіз, рухы нашар адамдардың ісі секілді, меніңще. Егер Рухыңызды күшейткіңіз келсе, өзіңізге деген сенімді арттырғыңыз келсе, Құран сүрелерін жаттап алып, оқып жүріңіз, мұңайған, қиналған, шошынған сәттерде жаныңызға демеу болары сөзсіз, және де оның пайдасы болмаса, жеке басыңызға ешбір зияны жоқ...
Ислам дінінде, ақыл-есі толмаған балаларға, немесе есін білмейтін ауру адамдарға рұхсат. "Ата-бабаларымыз бұрын тұмар таққан" деуіңіз мүмкін?! Ия, дұрыс айтасыз, бұрынғы ата-бабаларымыз оны көбіне, кішкентай нәрестенің бесігіне тағып қоятын болған. Біріншіден, сәбидің ақыл-есі әлі толмаған, екіншіден, бесіктің маңайы әрқашан таза болады. Тұмар тағудың тағы бір және ең басты "күнәсі" бар, сіз тұмар таққан соң, "бұл мені жын-періден, түрлі қауіптен қорғайды" деп сенесіз, сондай сәтте бірінші, сол тұмарға, екінші Аллаға сенесіз. Бұндай сәттерде шайтанның арбауына түскендей, Алла еріксіз екінші орынға ысырылып қалғандай болады... Шайтанның да бар мақсаты да сол, сенбейтін нәрсеге сендіріп, Жаратушыны кейінге ысыру! Сөйтіп, ол сізді Исламдағы ең үлкен күнә - бір Аллаға ширк (серік) қосуға итермелейді, және де ұстаған оразаларыңызды, тілеген тілектеріңізді, жасаған сауаптарыңызды жойып, бәрінен жұрдай қылуы мүмкін...
Хиджабқа қатысты жауап, бұл — балиғатқа толған ақыл-есі дұрыс  кісілерге міндеттелген істер. Сол міндеттелген істің бірі — хиджаб тарту. «Әйелдерге айт, өздеріне харам етілген нәрселерге қарамасын. Ұятты жерлерін зинадан, күнә атаулыдан қорғасын. Мәжбүр көрінген жерлерінен тыс әдеміліктерін көрсетпесін. Орамалдарын жағаларын да жабатындай етіп тақсын».  («Нұр» сүресінің 31-аяты).
Хиджаб — құлшылық-ғибадат мақсатымен киілетін киім.  Құранда қыз-келіншектердің киетін киімінің нақты пішімі көрсетілмеген. Бірақ нақты қай жерлерді ашық қалдыру керектігі жазылған. Мәжбүр көрінген жерлер дегеніміз  —  бет, білектен төмен екі қол, тобықтан төмен екі аяқ. Сондықтан басқа дене мүшелерін жабу керек. Бұл — Алланың бұйрығы.

Accaламуалейкум уа рахматуллаhи уа баракатуh! Әлеуметтік желілерге қыз-келіншектер өздерінің суретін қоюға болады ма (орамалы, жабық киiмi болса)?

Азиза

Барлық нәрсе ниетке байланысты. Өте маңызды болса болады.

Әулиенің бастарына барғанда үлкен кісілер шырақ жағып жатады солар дұрыс па? Және 7 нан таратуға болады ма? Малдың майын шыжғырып иіс шығарады деген дұрыс па? Ислам бұл жайында не дейді? Рахмет!

Сәндігүл  

Әулие аралауға шариғат рұхсат береді бірақ олардан сұрауға, оларға жалбарынуға болмайды. Шырақ шаманизмнен келген нәрсе, шариғатта орны жоқ, болмайды. Нанды садақа ретінде таратуына болады. Жай майды шыжғырып иіс шығарғаннан пайда жоқ, пісіріп таратса болады. Не сұралса да бір Алла тағаладан сұралады.