Жамбыл облысы Байзақ аудандық «Байзақ баба» мешітінің ұстазы Көшербаева Жанат Әмірханқызының ұйымдастыруымен «Құран мәңгі мұғжиза» атты рухани кеш өтті.

     Рухани кеште Жанат Әмірханқызы: «Алла Тағаланың кәләмі көркем тілімен, бай өрнегімен, толық мағыналығымен арабтардың өлең-жыр, поэзиясына ұқсамайтын ғажайып құрылымымен ерекшеленетін мұғжиза. Егерде қасиетті кітаптың мазмұнынан бұл ерекшеліктердің біреуі ғана табылмаса, ол мұғжиза болмас еді. Себебі, арабтардың кей сөздері көркемдікпен, шешендікпен айтылғанымен, онда кемел мағына болмайтын. Немесе, ол өлеңдер көркем сөздермен мағына берсе, ғажайып құрылымы болмайды. Кей жағдайларда, ғажайып құрылымды болып, бірақ көркем сөз бен кемел мағына бере алмайтын. Құран осы ерекшеліктердің барлығын қамтитын – мұғжиза кітап.

Мұны екі түрлі көзқараспен қарастырып көрелік:

Біріншіден, байырғы өткен халықтардың оқиғалары мен қиссаларын баяндайды. Пайғамбар (Оған Алланың игілігі мен сәлемі болсын) ол оқиғаларды көрмеді, кітаптарын оқымады, ешкімнен де сұрап алмады. Сондықтан, ол оған тек уахи арқылы ғана берілді.

Екіншіден, болашақта болатын оқиғаларды алдын-ала хабарлауы. Мәселен: «Рим жеңіледі» деген аятта айтылғандай-ақ болды. Ғайыптан хабар алу тек уахи жолымен болатыны белгілі. Бұл да Құранның мұғжизалығынан», - деді.

Шара соңында Құранға түскен 25 тәлім алушы қыздың бастарына тәж кигізіліп, Алланың сөзі Құран сыйлыққа берілді.