Мұсылман халқының басын қосып, қуаныш пен шаттықтың, ынтымақ пен берекенің қазандығы болған қасиетті Құрбан айт мейрамы Тараз шаһарында жоғарғы деңгейде аталып өтті. ҚМДБ-ның Жамбыл облысы бойынша бас имамы Бейбіт Мырзагелдиев көпшілік алдына шығып сөз сөйлеп, дүйім жұртшылықты Құрбан айт мерекесімен құттықтап, мерекелік шараны ашты. 

Мешіт жанына 8 қанат киіз үй тігіліп, дастахан жайлып, қуырдақ жасалды. Жиналған жұртшылық мешіт ауласында жайылған айттық дастарханнан дәм татып, бір-бірін құттықтап, жылы лебіздерін жеткізіп жатты.

Сонымен қатар балақайлар мұсылмандық мейрамның қызығын сезінсін, айт мерекесін біліп, көріп өссін деген мақсатта аулаға үлкен батут құрылып, балалар мәз-мейрам болды. 

Жамағатқа ұлттық ойындар сайысы ұйымдастырылып, көпшілік, "қошқар палуан", "арқан тартыс", "садақ тарту" сынды ойындарда бақ сынап, жеңімпаздар қаржылай сыйлықтармен марапатталды. 

"Садақ тарту" сайысы бойынша 1-орынға 15 000 теңге, 2-орынға 10 000 теңге, 3-орынға 5 000 теңге табысталды. "Қошқар палуан" сайысы бойынша жеңімпаз 143 рет қой көтеріп, аталған малды қанжығасына байлады. Айта кетейік, сайыс жеңімпазы ие болған қой  70 000 теңге бағаланады, сондай-ақ 45-50 кг ет береді. 

Білекті бірді жығар мықтылардың басқаларына ынталандыру ретінде қаржылай сыйлықтар тарту етілді. 

ҚМДБ-ның Жамбыл облысы бойынша баспасөз қызметі, «asyldin.kz» сайтының ұжымы да барша жұртшылықты  Құрбан айт мерекесімен құттықтайды. Алла Тағала баршаңыздың ниетіңізді қабыл етсін! 

Ақерке БЕКҚҰЛОВА

"Һибатулла Тарази" мешітінің баспасөз қызметі