Жамбыл ауданы орталық «Бәйдібек» мештінде ауданның бас имамы Ғайырфулла Қуанышбекұлы мешітке келген жамағатқа мұсылман баласы үшін бес парыздың бірі болған, құлшылық – намаз турасында кеңінен уағыз-насихат айтты. Намаз – жеті қат көкте парыз етілген құлшылық. Намаз сөзі дұға, тілек деген мағынаны білдіреді. Бұл – бес рет Жаратушымен қауышу мүмкіндігі, тәулігіне бес рет көмек сұрау, жәрдем тілеу. Намаз көп уақытты немесе күш-қайрат пен қаражатты қажет етпейді. Ең бастысы – ниет пен ықылас қана. Бес минутта жасалатын бұл құлшылық – барлық ғибадаттың әмбебап жиынтығы. 

Намаздың қандай маңызды құлшылық екендігін айтқан аудан имамы, оның денсаулыққа да бірден бір пайдасы бар екендігін айта келе,  намаз тек жайнамазда жасалатын қимыл-әрекеттер емес, намаздан тыс уақыттағы адамның жүріс-тұрысымен де тығыз байланысы бар екендігін де еске салды. Құбылаға бет бұрып құлшылық еткен сияқты жүрек әр сәтте Алла Тағаланың әміріне бойұсынып тұруы тиіс. Дайлами хадис кітабында: «Алла Тағала пенденің амалын жүрегі денесімен бір болмайынша қабыл етпейді», – деген риуаят бар.

Жамбыл аудандық мешітінің баспасөз қызметі