Тұрар Рысқұлов ауданы Қызылшаруа ауылдық орта мектебінде «Дін мен дәстүр» атты тақырыпта мектеп жастарымен кездесу өтті. Кездесуге Қызылшаруа ауылдық «Жусанбай ата» мешітінің имамы Құрақбаев Кенжебай қатысып, мектеп оқушыларына лекция айтып, дін мен дәстүрдің ара жігін ашып кеңінен түсіндіру жұмысын жасады.

Кенжебай имам сөзінің бірінде: «Қазақ халқының Ислам дінімен таныс болғанына мың екі жүз жылдан астам уақыт өтті. Содан бері салт-санасы, әдет-ғұрпы, әдебиеті мен мәдениеті мұсылмандыққа бейімделіп, ақырында Ислам діні халық ділімен біте қайнасып, ұлттық болмыстың ажырамас бөлгіне айналды. Ислам шариғаты дұрыс ұғымдарды, ізгі мұраттарды бекітіп, бұрыс ұғымдарды тоқтату үшін келді. Сондықтан мұсылман халықтарындағы дәстүрлерді елеп-екшейтін басты безбен шариғат болып саналады. Алланың Елшісіне (с.а.с.) пайғамбарлық түскен кезде арабтардың арасында да алуан түрлі әдетғұрыптар, дағдылар бар болатын. Пайғамбар (с.а.с.) олардың Құдай Тағаланың әмір-тыйымына керағар келмейтінін қабылдап, қарсы келетініне тыйым салды. Шариғатта халыққа үйреншікті болған жақсы дағдылар мен әдет-ғұрыптарды дәлел ретінде келтіруді барлық мазһабтардың имамдары қолдайды»,- деді.

 Қуаныш Тузелбеков

Рысқұлов аудандық мешіттің баспасөз қызметі