«Сарысу» аудандық орталық мешітінің жамағаты арасында «Бірлік алаңы» атты апталық футбол ойыны ұйымдастырылды.
Спорттық кездесудің алдында Нұрмахар Санжар ұстаз жамағатқа ойынның тәртібі мен әдебі жөнінде насихат айтып, футбол барысында бейәдеп сөздерден, орынсыз әрекеттерден аулақ болудың маңыздылығына тоқталды. Ұстаз спорттық бәсекенің өзара құрметке, сабырлыққа және көркем мінезге негізделуі керектігін еске салды.
Одан кейін қатысушылар футбол алаңында өзара бақ сынасып, командалық ойын арқылы ұйымшылдық пен бірліктің үлгісін көрсетті. Кездесу барысында жамағаттың спортқа деген қызығушылығы артып, өзара бауырмалдық пен достық қарым-қатынасты нығайтуға мүмкіндік туды.
«Бірлік алаңы» апталық футболының негізгі мақсаты – салауатты өмір салтын насихаттау, жамағат арасындағы ынтымақты арттыру және жастарды пайдалы әрі тәрбиелік мәні бар ортаға тарту.
Спорт – денсаулықтың кепілі ғана емес, өзара сыйластық пен тәртіпті қалыптастыратын маңызды құрал. Дін мен денсаулықты қатар ұстанған, рухани әрі физикалық тұрғыдан дамыған жастарымыз көбейе берсін!
Бірлігіміз бекем, бауырластығымыз мәңгі болсын!
Сарысу аудандық мешітінің баспасөз қызметі



21 Қараша 2026
10 Джумада-сани 1448

