Тараз қаласындағы мешіттерде тазалық пен тәртіпті сақтау, қоршаған ортаны көркейту және тазалық мәдениетін қалыптастыру мақсатында сенбілік жұмыстары өткізілді.

Игі шара аясында мешіт қызметкерлері мен жамағат өкілдері бірлесе отырып, мешіт аулалары мен айналасын тазалау жұмыстарына қатысты.

Атап айтқанда, мешіт аумақтарындағы қоқыстар жиналып, аулалар сыпырылды, аяқжолдар ретке келтіріліп, көгалдар  тазалығына көңіл бөлінді.

Сонымен қатар, мешіт ғимараттарының айналасы ретке келтіріліп, жамағаттың құлшылық жасауына қолайлы әрі таза орта қалыптастыру бағытында жұмыстар атқарылды.

Аталған сенбілік жұмыстарының негізгі мақсаты – тазалықты сақтау арқылы қоршаған ортаға деген жауапкершілікті арттыру, мешіттердің көркін келтіру және қоғам арасында тазалық мәдениетін насихаттау.

Ислам дінінде тазалыққа ерекше мән беріледі. Ардақты Пайғамбарымыз Мұхаммед ﷺ тазалықтың маңыздылығын хадистерінде атап өткен. Сондықтан қоршаған ортаны таза ұстау, қоғамдық орындарды күтіп-баптау – әрбір мұсылманның азаматтық әрі адамгершілік міндеттерінің бірі.

Осындай игі шаралар мешіттердің тек құлшылық орны ғана емес, қоғамның рухани және тәрбиелік орталығы екенін де көрсетеді.