Тоғызтарау ауылындағы Тоғызтарау мешітінің алды демеушілердің қолдауымен абаттандырылып, ауладағы брусчаткалар жаңасына ауыстырылды. Игі істің басты мақсаты – мешіт аумағын көркейтіп, жамағаттың құлшылық жасауға келген сәтінде қолайлы әрі таза орта қалыптастыру болды. Аталған жұмыстар ауыл тұрғындарының діни ордаға деген құрметін арттырып қана қоймай, қоршаған ортаны күтіп ұстау мен ортақ игілікке үлес қосудың маңызын да айқындай түсті.

Жөндеу жұмыстарының жүзеге асуына қолдау білдірген демеушілердің азаматтық жауапкершілігі мен сауапты іске деген ықыласы көпшілікке үлгі боларлықтай. Ислам дінінде мешіттерді күтіп ұстау, олардың тазалығы мен көркемдігіне мән беру сауапты амалдардың қатарына жататындықтан, мұндай игі бастамалардың рухани әрі қоғамдық маңызы зор.

Сонымен қатар мешіт аумағының жаңаруы ауылдың көркін арттырып, тұрғындардың ортақ мүлікке жанашырлықпен қарауына оң ықпал етеді. Тоғызтарау мешітінің ұжымы сауапты іске атсалысқан демеушілерге алғыс білдіріп, олардың игі істеріне береке мен мол сауап тілейді.

Жамбыл аудандық орталық мешітінің баспасөз қызметі