Тараз қалалық орталық «Әулие ата» мешітінде Тараз қаласының Бас имамы Ержан Аманбаевтың қатысуымен лудомания тақырыбына арналған пәтуа сағаты өтті.

Іс-шара барысында құмар ойындарға тәуелділіктің адам өміріне, отбасына және қоғамға тигізетін кері әсері талқыланды. Сонымен қатар, ислам дініндегі құмар ойындардың үкімі түсіндіріліп, мұндай зиянды әдеттерден сақтанудың маңыздылығы айтылды.

Бас имам құмар ойындардың адамды материалдық шығынға, рухани күйзеліске және отбасылық қиындықтарға алып келуі мүмкін екенін атап өтті. Сондай-ақ жамағатты адал еңбек етуге, уақытты тиімді пайдалануға және діни құндылықтарды берік ұстануға шақырды.

Пәтуа сағатының негізгі мақсаты — қоғамда лудоманияның алдын алу, діни сауаттылықты арттыру және жамағатқа құмар ойындардың шариғаттағы үкімін түсіндіру.