Әл-Әділ мешітінде Амиреева Ләззат ұстаздың ұйымдастыруымен шәкірттердің діни сауаттылығын арттыру, Ислам дінінің негіздерін тереңірек меңгерту мақсатында діни білімге арналған танымдық іс-шара ұйымдастырылды. Іс-шара барысында шәкірттерге Құран Кәрім, хадис ілімі және Ислам тарихына қатысты сұрақтар қойылып, олардың діни білімдері сараланды.

Түрлі тақырыптарды қамтыған сұрақтар арқылы шәкірттер өз білімдерін ортаға салып, алған ілімдерін пысықтауға мүмкіндік алды. Діни білім сайысы шәкірттердің ізденісін арттырып қана қоймай, олардың Құран мен сүннетке деген қызығушылығын оятып, білімге деген ынтасын нығайтуға ықпал етті.

Ислам дінінде білім алудың орны ерекше. Пайдалы білім адамды ізгілікке жетелеп, көркем мінезді қалыптастыруға және рухани тұрғыдан кемелденуге жол ашады. Сондықтан жас ұрпақтың діни сауатын арттырып, дұрыс бағытта білім алуына жағдай жасау – маңызды міндеттердің бірі. Алла Тағала барша шәкірттеріміздің білімін арттырып, алған ілімдерін пайдалы етіп, ізгі амалдар жасауға нәсіп етсін!