Қордай ауданы, аудандық «Қордай» мешіті әйел ұстазы Эльмира Аманқожақызының ұйымдастыруымен «Отбасы күніне» орай әйелдер мен қыз-келіншектерге арналған айлық дастарқан өтті. Басқосу барысында ұстаздар Эльмира Аманқожақызы, Айгүл Жолдасқызы және Малика Аханқызы «Отбасы құндылықтары» тақырыбында насихат айтып, отбасындағы өзара сыйластық, түсіністік пен жауапкершіліктің маңызына тоқталды. Сонымен қатар ата-ананы құрметтеу, бала тәрбиесіне көңіл бөлу және шаңырақтағы береке мен татулықты сақтау жөнінде ой бөлісті. Кездесу барысында қатысушылар отбасыға қатысты мақал-мәтелдер айтып, тақырыпқа байланысты қызықты ойындар ойнады.

Танымдық әрі тәрбиелік бағыттағы басқосу өзара пікір алмасып, жақсы көңіл күйде өтті. Жиын соңында ел-жұрттың амандығы, отбасылардың берекесі мен бірлігі үшін дұға жасалып, ақжолтай тілектер айтылды.

Аудандық «Қордай» мешіті баспасөз қызметі