Әбдірашит ата мешітінде Ахат Қайыпбергенұлы көпшілікке ізгі насихат айтып өтті. Уағыздың негізгі өзегі — діннің адамзатты бірлікке, бауырластыққа, ізгілікке шақыруы тиіс екендігі. Алайда кейбір радикалды діни ағымдар діни түсіністікті емес, керісінше алауыздық пен бөлінушілікті күшейтуі мүмкін. Мұндай ағымдардың ең қауіпті тұсы — олардың қоғамды сырттай ғана емес, отбасының ішінен ірітуі. Діни көзқарастағы айырмашылықты желеу етіп, ата-ана мен баланың, ерлі-зайыптылардың, ағайын-туыстың арасына сызат түсіруі.

Негізі асыл дініміз адамды ата-анасынан, туған-туысынан, ағайынынан алыстатпауға, керісінше үлкенді сыйлап, кішіге қамқор болып, қоғаммен тату өмір сүруді насихаттайтынын тілге тиек етті. Алла Тағала баршамызға ауызбіршілігіміз бекем, еліміз аман, жұртымыз тыныш болуын нәсіп етсін деп сөзін түйіндеді.

"Әбдірашит ата" мешітінің баспасөз қызметі