Аса ауылы, Бәйдібек мешіті жанындағы діни сауат ашу курсында білім алып жүрген шәкірттердің Құран оқу жолындағы кезекті белесі болып, екі шәкірт Құранға түсу рәсімін абыроймен аяқтады.

Қасиетті Құранды жүйелі түрде оқып, сүрелер мен аяттарды жаттауға талпынып жүрген шәкірттердің бұл жетістігі олардың діни білімге деген ынтасы мен ізденісінің нәтижесі екені атап өтілді.

Игі шара барысында шәкірттердің еңбегін бағалап, олардың Құранға деген сүйіспеншілігін арттыру мақсатында діни сауат ашу курсының ұстазы Жайна Бекназарова шәкірттеріне Құран кітабын сыйға тартты.

Ұстаз тарапынан жасалған бұл сый шәкірттер үшін рухани мәні зор тарту болып, олардың қасиетті Кітапты тұрақты оқып, мағынасын түсінуге және өмірлерінде амал етуге деген құлшынысын одан әрі арттыра түсті.

Құран оқу – мұсылманның жүрегіне иман нұрын ұялатып, көркем мінез бен ізгі амалға бастайтын ұлы құлшылықтардың бірі болғандықтан, шәкірттердің осы бағыттағы әрбір қадамы ерекше маңызға ие.

Сабақ барысында ұстаз шәкірттерге Құранды тек оқып қана қоймай, ондағы өнегелі өсиеттерді жүрекке сіңіріп, күнделікті өмірде жақсы мінез бен ізгілікке ұмтылудың маңыздылығын түсіндірді.

Құранға түскен шәкірттер өз кезегінде діни білім алуға мүмкіндік жасап, бағыт-бағдар беріп келе жатқан ұстаздарына ризашылықтарын білдіріп, алған білімдерін әрі қарай жетілдіруге ниетті екендерін жеткізді.

Мұндай тағылымды кездесулер жас ұрпақтың рухани дүниесін байытып қана қоймай, олардың мешітпен байланысын нығайтып, діни сауаттылыққа деген қызығушылығын қалыптастыруға зор ықпал етеді.

Бәйдібек мешіті жанындағы діни сауат ашу курсының басты мақсаттарының бірі – шәкірттерге Құран әліппесінен бастап діни білімнің негіздерін үйретіп, оларды имандылыққа, ізгілікке және адамгершілік құндылықтарға тәрбиелеу болып табылады.

Осылайша, шәкірттердің Құранға түсуі – олардың білім жолындағы маңызды жетістігі ретінде бағаланып, ал сыйға тартылған қасиетті кітаптар алдағы уақытта Құранмен тұрақты байланыста болып, рухани ізденістерін жалғастыруға себепкер болатын естелік сыйға айналды.

Жамбыл аудандық орталық мешітінің баспасөз қызметі