Жамбыл ауданына қарасты Айшабибі ауылындағы Айшабибі мешіті жанындағы діни сауат ашу курсында ардақты Пайғамбарымыз Мұхаммедтің (с.а.у.) өнегелі ғұмырын ұлықтауға арналған "Мәуліт мерекесі" тағылымды түрде атап өтілді.

Ізгі шараның басты мақсаты – шәкірттердің діни танымын кеңейтіп, Алла Елшісінің (с.а.у.) көркем мінезі мен адамзатқа қалдырған ғибратты өнегесін жас ұрпақтың жүрегіне сіңіру болды.

Мерекелік жиын барысында Пайғамбарымыздың (с.а.у.) өмір жолы, адамгершілік қасиеттері, үмбетіне деген мейірімі мен ізгілігі жайында мазмұнды насихат айтылып, қатысушыларға рухани мағлұматтар берілді.

Діни сауат ашу курсында білім алып жүрген шәкірттер Мәуліттің мән-маңызын тереңірек түсініп, сүйікті Пайғамбарымыздың (с.а.у.) сүннетін үлгі ету мұсылман баласы үшін аса маңызды екеніне назар аударды.

Шара барысында Құран аяттары оқылып, салауаттар айтылып, жүректерге имандылық нұрын ұялататын рухани әсері мол уағыз-насихаттар тыңдалды.

Жиынға қатысушылар Пайғамбарымыздың (с.а.у.) өміріндегі сабыр, кешірім, мейірімділік, адалдық пен бауырмалдық секілді асыл қасиеттердің қазіргі қоғам үшін де маңызы зор екенін үйренді.

Мәуліт мерекесі шәкірттерге діни білім мен көркем мінездің өзара сабақтастығын ұғындырып, алған білімді күнделікті өмірде ізгі амалдар арқылы көрсетуге үндеген мазмұнды басқосуға ұласты.

Сондай-ақ, жас шәкірттерге үлкенді құрметтеу, кішіге ізет көрсету, ата-анаға мейірім таныту және айналасына жақсылық жасау сынды адамгершілік құндылықтардың Исламдағы орны кеңінен түсіндірілді.

Рухани шара соңында елдің амандығы мен жұрттың бірлігі, береке-бірліктің нығаюы және жас ұрпақтың иманды да тәрбиелі болып қалыптасуы үшін дұға жасалды.

Мәуліт мерекесіне арналған тағылымды кездесу Айшабибі мешіті жанындағы діни сауат ашу курсының шәкірттеріне рухани серпіліс беріп, Пайғамбарымыздың (с.а.у.) өнегелі жолын тануға деген қызығушылықтарын арттырған мәнді шара болды.

Жамбыл аудандық орталық мешітінің баспасөз қызметі