«Жақсылық жасау – жүректің жылуы, қайырымдылық – қоғамның берекесі» деген асыл бастамамен Тараз қалалық орталық «Әулие ата» мешітінде сауапты әрі игі шара болып өтті.

5 қыркүйек – Халықаралық қайырымдылық күніне орай Жамбыл облыстық «Зекет және қайырымдылық» қорының өкілі Ержан Аманбаевтың ұйытқы болуымен арнайы қайырымдылық акциясы ұйымдастырылды. Шара барысында әлеуметтік көмекке мұқтаж 3 көпбалалы отбасы мен 2 мүмкіндігі шектеулі жанға азық-түлік себеттері және ет өнімдері үлестірілді.

Қор өкілдері мұндай қайырымдылық бастамаларының басты мақсаты – қоғамда өзара бауырмашылық пен жанашырлықты арттыру, сондай-ақ қиын жағдайға тап болған жандарға рухани әрі демеушілік қолдау білдіру екенін атап өтті. Көмек алған отбасылар ұйымдастырушылар мен демеушілерге ақ тілектерін арнап, шынайы ризашылықтарын білдірді.

Тараз қалалық мешітінің баспасөз қызметі