Байзақ ауданы Түймекент ауылының мәдениет үйінде аудан бас имамы Қанат Әділханұлы ауыл тұрғындарымен кездесіп, қазақ халқының салт-дәстүрі мен ұлттық құндылықтарының маңызы жөнінде тағылымды насихат жүргізді. Кездесу барысында үлкенге құрмет, кішіге ізет көрсету, ата-ананы сыйлау, ағайынмен тату болу, қонақжайлық, қайырымдылық және аманатқа адалдық секілді халқымыздың ғасырлар бойы қалыптасқан ізгі дәстүрлері сөз болды.

Бас имам ұлттық салт-дәстүрлердің тәрбиелік мәніне тоқталып, халқымыздың жақсы дәстүрлерін дәріптеу – өскелең ұрпақтың бойына имандылық, адамгершілік пен отансүйгіштік қасиеттерді қалыптастырудың маңызды жолы екенін атап өтті. Жиын соңында ауыл тұрғындары ұлттық құндылықтарды дәріптеп, кейінгі ұрпаққа өнеге етіп жеткізудің маңыздылығына тоқталды.