Жаңа оқу жылы қарсаңында аудандық Қаратау қажы би мешітінде балаларға қуаныш сыйлаған қайырымдылық шарасы өтті.

Ауданның бас имамы Жалғасбай Дүйсенбайұлының бастамасымен және «Ризық-Мүбәрак» қоғамдық қорының қолдауымен ұйымдастырылған «Мектепке жол» акциясы аясында аз қамтылған отбасылардан шыққан 50 оқушыға сыйлықтар табысталды. Оқушыларға тарту етілген мектеп сөмкелері жай ғана сөмке емес, жаңа оқу жылына қажет құрал-жабдықтардың барлығымен толықтырылды. Бұл – ата-аналардың мектепке дайындық барысындағы жүгін жеңілдетіп, балалардың оқу жылын көтеріңкі көңіл-күймен бастауына жасалған қолдау.

Іс-шара барысында ізгі ниет пен қамқорлықтың маңызы айтылып, балаларға жаңа оқу жылында жақсы білім алып, биік белестерді бағындыруға тілектер білдірілді. Бір балаға жасалған жақсылық – бір отбасының қуанышы. Осындай игі бастамалардың жүзеге асуы қоғамдағы жанашырлық пен өзара қолдаудың маңызын айқындай түседі.

Аудандық Қаратау қажы би мешіті баспасөз қызметі