Аса ауылындағы «Домалақ ана» мешітінде имам Расылхан Сыбанбайдың қатысуымен жамағатқа «Отбасы құндылықтары» тақырыбында тағылымды уағыз айтылды. Уағыз барысында отбасының қоғамның негізгі тірегі әрі ұлт тәрбиесінің алтын бесігі екендігі жан-жақты түсіндіріліп, оның берекесі өзара сүйіспеншілікке, сыйластық пен жауапкершілікке негізделетіні кеңінен насихатталды.

Имам ерлі-зайыптылардың бір-бірінің алдындағы құқықтары мен міндеттерін адал орындауы отбасы татулығының басты кепілі екенін ерекше атап өтті. Сонымен қатар, бала тәрбиесінде ата-ананың өнегелі мінезі, мейірімі және дұрыс діни тәрбиесі шешуші рөл атқаратыны жөнінде тағылымды ойлар айтылды.

Кездесу барысында үлкенді құрметтеу, кішіге қамқорлық көрсету, туыстық байланысты нығайту және отбасы мүшелерінің бір-біріне жанашыр болуы Ислам дінінің асыл қағидаларының бірі екендігі түсіндірілді. Сондай-ақ, қазіргі қоғамдағы ажырасудың алдын алу, отбасындағы өзара түсіністік пен сабырлылықты сақтау мәселелеріне ерекше назар аударылды.

Уағыз соңында жамағат тарапынан қойылған сауалдарға Құран аяттары мен Пайғамбарымыздың (с.ғ.с.) сүннеті негізінде жан-жақты жауаптар беріліп, мазмұнды пікір алмасу ұйымдастырылды. Іс-шараның басты мақсаты – отбасы институтын нығайту, ұлттық және рухани құндылықтарды дәріптеу, сондай-ақ қоғамда берекелі әрі өнегелі отбасылардың қалыптасуына ықпал ету болды. Осындай рухани кездесулер халықтың діни сауатын арттырып, отбасылық бірлік пен қоғамдық келісімі нығаяды.

Жамбыл аудандық орталық мешітінің баспасөз қызметі