Аудандық Қаратау қажы би мешітінде жамағатқа арналған тағылымды кездесу өтіп, наиб имам Асқарбек Серікұлы «Жаназа рәсіміндегі дәстүрдің көрінісі» тақырыбында ой бөлісті. Адам өміріндегі ең жауапты сәттердің бірі – дүниеден өткен жанды соңғы сапарға шығарып салу.

Осы ретте имам жаназа рәсімінің Исламдағы орны мен халқымыздың ғасырлар бойы қалыптасқан жөн-жоралғыларымен байланысына тоқталды. Насихат барысында қазақ халқының қайғыға ортақтасу, марқұмның жақындарына демеу көрсету, ағайынның бір жерден табылып, ұйымшылдық таныту секілді ізгі дәстүрлерінің мәні түсіндірілді. Мұндай рәсімдердің түпкі мақсаты – адамды құрметтеу, тірілерге сабыр мен жауапкершілікті насихаттау екені айтылды.

Сонымен қатар жаназа рәсімдерін атқаруда дін талаптарын дұрыс түсіну, салт-дәстүрдің тәрбиелік мәнін сақтау және ысырапшылдыққа жол бермеу мәселелері қозғалды. Кездесу барысында жамағатқа өмірдің өткіншілігі, адамдық парыз бен ағайын арасындағы сыйластық жайында тағылымды насихат айтылып, қатысушылар көкейдегі сауалдарына жауап алды.

Аудандық Қаратау қажы би мешіті баспасөз қызметі.