Жамбыл облысы, Байзақ аудандық мешітінде қасиетті Құрбан айт мерекесіне орай айт намазы оқылып, жамағат мерекелік құлшылыққа қатысты. Таң сәріден мешітке жиналған аудан тұрғындары құрбан айт намазын оқып, бір-біріне ізгі тілектерін жеткізді. Құрбан айт – мұсылман жұртшылығын бауырмалдыққа, мейірім мен қайырымдылыққа үндейтін ұлық мереке екені насихатталды.

Мерекелік жиында ауданның бас имамы Қанат Әділханұлы жамағатқа насихат айтып, Құрбан айттың рухани мәні мен маңыздылығына тоқталды. Сонымен қатар құрбан шалудың шариғаттағы орны, мұқтаж жандарға көмек көрсетудің сауабы және қоғамдағы ауызбіршілікті нығайтудың маңызы жөнінде тағылымды ойларымен бөлісті. Имам өз сөзінде халқымыздың ізгі дәстүрлерін дәріптеп, ел амандығы мен жұрт тыныштығы үшін дұға жасады.

Айт намазынан кейін мешіт ауласында жиналған жамағат бір-бірімен мерекелік көңіл-күйде қауышып, құрбандық ғибадатының сауапты амал екені кеңінен түсіндірілді. Сонымен қатар аудан мешіттерінде қайырымдылық шаралары ұйымдастырылып, мұқтаж отбасыларға қолдау көрсету жұмыстары жүргізілетіні айтылды.

Қасиетті Құрбан айт мерекесі барша мұсылман қауымын ізгілікке үндеп, татулық пен берекені арттыра түсер рухани мереке екені атап өтілді.