«Әулие ата» мешітінің ұйымдастыруымен көпшіліктің басын біріктірген ауқымды қайырымдылық жәрмеңкесі өтті. Игі шараның негізгі мақсаты — әлеуметтік жағынан аз қамтылған және мұқтаж отбасыларға қолдау көрсету, сондай-ақ қоғамда мейірімділік пен жанашырлық құндылықтарын кеңінен дәріптеу.

Жәрмеңке барысында қала тұрғындары мен қонақтарына түрлі азық-түлік өнімдері, киім-кешектер мен күнделікті тұрмысқа қажетті заттар қолжетімді бағада ұсынылды. Сауапты шараға мешіт жамағаты, белсенді жастар мен еріктілер біркісідей атсалысып, игі істің жоғары деңгейде өтуіне өз үлестерін қосты.

Қасиетті Құран Кәрімде: «Кімде-кім бір жақсылық жасаса, оған еселенген сауап бар» деп баян етілгендей, мұндай ізгі амалдар қоғамдағы ауызбіршілік пен өзара көмек көрсету мәдениетін нығайта түсері сөзсіз. Жәрмеңкеге келген көпшілік қауым ізгілікті іске мұрындық болған мешіт ұжымына шынайы ризашылықтарын білдіріп, алғыстарын жаудырды.

Мешіт қызметкерлері мұқтаж жандарға жылулық сыйлайтын осындай игі жобалар мен қайырымдылық шаралары алдағы уақытта да тұрақты түрде ұйымдастырылатынын жеткізіп, барша жамағатты жақсылық жарысында белсенді болуға шақырды.

«Әулие ата» мешітінің баспасөз қызметі