Қордай ауданы, Қақпатас ауылындағы «Қақпатас» мешітінің имамы Жармахамбет Танаубайұлының қатысуымен Ұлы Отан соғысы ардагерлерін еске алуға арналған тағылымды шара өтті.

Іс-шара барысында майдангер   аталардың ерлігі мен ел қорғаудағы жанқиярлық еңбегі кеңінен насихатталып, олардың есімі ұрпақ жадында мәңгі сақталуы керектігі айтылды. Ауыл ақсақалдары мен жамағат ардагерлердің өнегелі өмір жолын еске алып, бейбіт күннің қадір-қасиеті туралы ой бөлісті. Шара аясында Ұлы Отан соғысында қаза тапқан және өмірден өткен ардагерлердің рухына Құран бағышталып, арнайы дұға жасалды.

Имам Жармахамбет Танаубайұлы отансүйгіштік, елге қызмет ету және бірлік сынды құндылықтарды сақтау – әрбір азаматтың борышы екенін атап өтті. Жиын соңында жамағат ел амандығы, тыныштық пен берекелі өмір тілеп, марқұм болған ардагерлер рухына тағзым етті.

Аудандық «Қордай» мешіті баспасөз қызметі