9 мамыр – Жеңіс күніне орай Мойынқұм ауданында Ұлы Отан соғысы ардагерлерінің рухына Құран бағышталды. Тағылымды шараға ауданның бас имамы Ержан Көшкімбай майдан даласында ерлік көрсеткен батырлардың рухына арнайы дұға жасады.

Рухани басқосуда ел қорғаған ардагерлердің жанқияр ерлігі мен Отан алдындағы адал қызметі кеңінен айтылып, олардың есімі халық жадында мәңгі сақталатыны атап өтілді. Сонымен қатар, жамағатпен бірге Құран оқылып, өмірден өткен соғыс ардагерлерінің рухына бағышталды.

Аудан бас имамы Ержан Көшкімбай өз сөзінде бейбіт өмірдің қадірін бағалап, ел бірлігі мен татулықты сақтау – бүгінгі ұрпақтың басты міндеті екенін жеткізді. Сондай-ақ, жастарды отансүйгіштікке, үлкенді құрметтеуге және тарихты ұмытпауға шақырды.

Мойынқұм ауданының «Мойынқұм» мешітінің баспасөз қызметі.