Жан-жануарлардың адам өміріндегі орны ерекше. Алла Тағала қасиетті Құран Кәрімнің «Мүминун» сүресінің 21-аятында: «Расында сендер үшін малдарда ғибрат бар. Сендерге олардың іштеріндегі сүтін ішкіземіз. Сондай-ақ сендер үшін оларда көптеген пайдалар бар әрі олардың етін де жейсіңдер», – деп баяндайды.

Бұл аяттан мал-жанның адамзат тіршілігіне қажетті үлкен нығмет екендігін аңғарамыз. Сондықтан табиғатты қорғау, қоршаған ортаға жанашырлықпен қарау – әрбір мұсылманның міндеті. Қордай ауданының бас имамы Азамат Берікұлы аудандық «Қордай» мешітінде жұма намазын өткізіп, жамағатқа «Тазалық, табиғат пен қоршаған ортаны қорғау» тақырыбында уағыз-насихат айтты.

Насихат барысында көктем мезгілінде айналаны таза ұстау, үй маңын, мешіт ауласын, зираттар мен қоғамдық орындарды тазалау – сауапты іс әрі мұсылман әдебінің бір көрінісі екендігі айтылды. Сонымен қатар табиғатқа жанашырлық танытып, қоршаған ортаны ластамау – имандылықтың белгісі екені ескертілді. Алла Тағала баршамызға тазалыққа мән беріп, табиғатты аялауды нәсіп етсін!

Аудандық «Қордай» мешіті баспасөз қызметі