Ардақты Пайғамбарымызды (оған Алланың салауаты мен сәлемі болсын) көзімен көрген сахаба Әбу Дәрда (Алла оған разы болсын) қартайған шағында Дамаск қаласында жеміс көшетін отырғызып жатқанда, бір кісі: «Жасыңыз келіп қалды ғой, мұны не үшін істеп жатырсыз?» – деп сұрайды.

Сонда Әбу Дәрда (Алла оған разы болсын): «Асықпа, сабыр ет! Бізден бұрынғылар ағаш отырғызды, біз оның жемісін жедік. Енді отырғызу – біздің кезегіміз. Оны кейінгі ұрпақ пайдаланады», – деп жауап береді. Сондай-ақ ол Пайғамбарымыздың (оған Алланың салауаты мен сәлемі болсын): «Қандай да бір мұсылман ағаш отырғызса немесе егін ексе, одан адамдар, жануарлар, құстар жесе – ол оған садақа болып жазылады», – деген хадисін жеткізген.

Осы орайда Қордай аудандық «Қордай» мешітінің аумағында жеміс ағаштары отырғызылды. Игі іске жамағат белсене қатысып, мешіт ауласын көркейтуге үлес қосты. Бұл бастаманы қолдаған барша жандардың дұға-тілектері қабыл болып, жасаған амалдары Алла Тағаланың разылығына жетелесін!

Аудандық «Қордай» мешіті баспасөз қызметі