Адам өміріндегі ең қымбат байлықтардың бірі – туыстық байланыс. Ислам діні туыстармен жақсы қарым-қатынаста болуды ерекше дәріптейді. Бұл – тек адамгершілік қағидасы ғана емес, сонымен қатар сауапты құлшылықтың бір түрі. Алла Тағала Құран Кәрімде туыстық байланысты үзбеуді бұйырады. Ал Пайғамбарымыз (оған Алланың салауаты мен сәлемі болсын): «Кімде-кім ризық-несібесінің кеңейгенін, өмірінің ұзақ болғанын қаласа, туыстық қатынасын жалғастырсын», – деген. Бұл хадис туыстық байланыстың тек рухани емес, дүниелік пайдасы да бар екенін көрсетеді.

           Туыстық қарым-қатынас – адам өміріндегі ең маңызды құндылықтардың бірі. Әрбір адам дүниеге келген сәттен бастап отбасы мен туыстарының ортасында өсіп, тәрбие алады. Сондықтан туыстар арасындағы сыйластық пен бірлік – адамның да, қоғамның да берекесінің негізі. Қазақ халқы ежелден: «Ағайын тату болса – ат көп, абысын тату болса – ас көп» деп, туыстық қатынастың маңызын жоғары бағалаған. Расында да, туыстар бір-біріне қамқор болып, қиындықта демеу болса, кез келген мәселені еңсеру оңайырақ болады. Ал керісінше, арада реніш пен алауыздық орын алса, ол тек отбасының ғана емес, тұтас қоғамның тыныштығына әсер етеді.

           Өкінішке қарай, қазіргі қоғамда кейбір адамдар туыстарымен араласпай, өкпе-ренішке бой алдырып жатады. Болмашы себеппен араздасып, жылдар бойы сөйлеспей кету – үлкен қателік. Себебі туыстық байланысты үзу – ауыр күнәлардың бірі. Ислам діні туыстық байланысты сақтауға ерекше мән береді. Пайғамбарымыз (оған Алланың салауаты мен сәлемі болсын) хадистерінде туыстық қатынасты үзбеуді, керісінше нығайтуды өсиет еткен. Себебі туыспен араласу – сауапты іс, ал оны үзу – үлкен күнә. Туыстық  қарым-қатынасты нығайтудың қарапайым жолдары:

– Амандасып, хал-жағдай сұрау

– Қуанышта бірге болып, қайғыда қолдау көрсету

– Қажет кезде көмек қолын созу

– Кешірімді болу

            Туыстық қарым-қатынас тек мерекеде ғана емес, күнделікті өмірде де көрініс табуы тиіс. Қуанышта бірге күліп, қиындықта бірге болу – нағыз бауырмалдықтың белгісі. Кешірімділік пен түсіністік бұл байланысты одан әрі нығайтады. Туыстарымен жақсы қарым-қатынас орнатқан адам қоғамда да сыйлы болады. Өйткені ол мейірімділікке, жанашырлыққа, кешірімділікке тәрбиеленеді. Ал туыстарымен араз адам көбіне ішкі тыныштығын жоғалтады. Сондықтан, ағайын, туыстық байланысты үзбейік. Кім бірінші болып сәлем берсе – сол абзал. Егер реніш болса, кешірім сұраудан тартынбайық. Өйткені кешірім – әлсіздік емес, керісінше рухани күштің белгісі.

            Қорытындылай келе, туыстық қарым-қатынас – береке мен бірліктің кілті. Оны сақтау – әрбір мұсылманның міндеті. Егер әрқайсымыз туыстарымызбен тату-тәтті өмір сүрсек, қоғамымыз да мейірімді әрі берекелі болары сөзсіз. Алла Тағала баршамызға туыстарымызбен тату өмір сүруді нәсіп етсін!

 Нұрмұхамед Кеулимжаев 

Қордай  ауданы, Қордай ауылы

«РАХМАН» мешітінің имамы