Ислам күнтізбесінде әрбір айдың өзіндік орны мен тәрбиелік мәні бар. Сол айлардың ішінде Рамазаннан кейін келетін Шәууәл айының маңызы ерекше. Өйткені бұл ай – бір ай бойы жасалған құлшылықтардың жалғасы, иманның тұрақтылығы сыналатын кезең. Рамазан айында мұсылман нәпсісін тәрбиелеп, сабыр мен тақуалыққа үйренсе, Шәууәл – сол игі әдеттерді сақтап қалудың көрсеткіші.

    Шәууәл  айының ең басты ерекшеліктерінің бірі – алты күн нәпіл ораза ұстау. Бұл жайында Пайғамбарымыз (оған Алланың салауаты мен сәлемі болсын): «Кім Рамазан айында ораза ұстап, кейін оған Шәууәл айынан алты күн қосса, ол бір жыл бойы ораза ұстағандай болады», – деген. Бұл оразаның бір жылдық сауабына тең болуының мәнін ғалымдар былай түсіндіреді: Алла Тағала Құран Кәрімде: «Кімде-кім бір жақсылық жасаса, оған он есе сауап беріледі», – деп баяндайды. Рамазанның 30 күні мен Шәууәлдің 6 күні қосылып, 36 күн болады. Егер әрбір күннің сауабы он есеге көбейтілсе, 360 күнге тең келеді. Бұл – бір жылдық оразаның сауабына пара-пар. Бұл – Алланың құлдарына деген шексіз мейірімі мен кеңшілігінің белгісі.

         Шәууәл оразасын қатарынан ұстау шарт емес, оны бөліп-бөліп ұстауға да болады. Ең бастысы – осы алты күнді Шәууәл айының ішінде орындау. Бұл – мұсылманның құлшылыққа деген ықыласын, Рамазаннан кейін де амалдарын жалғастыруға деген ниетін білдіреді.

Сонымен қатар, Шәууәл айы – Рамазан айының жемісін сақтап қалу кезеңі. Рамазанда көпшілік намазға көңіл бөліп, Құран оқып, садақа беруге тырысады. Алайда бұл игі амалдар Рамазанмен бірге тоқтап қалмауы тиіс. Нағыз тақуалық – құлшылықтың үздіксіз болуы.

Егер адам Рамазаннан кейін де намазын тастамай, көркем мінезін сақтаса, бұл оның жүрегінде иманның орныққанын көрсетеді.

         Шәууәл айының тағы бір ерекшелігі – Ораза айт мерекесінің осы айдың басында аталып өтілуі. Бұл – Рамазан айының аяқталуына байланысты мұсылмандардың қуаныш күні. Айт күні адамдар бір-бірімен көрісіп, өкпе-реніштерін кешіріп, туыстық байланыстарын нығайтады. Мұқтаж жандарға көмек көрсетіп, қоғамда мейірімділік пен бауырмалдықты арттырады.

Шәууәл айы бізге маңызды бір сабақты үйретеді: құлшылық тек белгілі бір уақытпен шектелмеуі керек. Аллаға құлшылық ету – өмір бойы жалғасатын амал. Сондықтан Рамазанда басталған игі әдеттерді Шәууәлде жалғастырып, оны тұрақты дағдыға айналдыру – әрбір мұсылманның басты мақсаты. Шәууәл – жай ғана уақыт емес, ол – мүміннің тұрақтылығы мен шынайы ықыласының айғағы.

Абдужалил Шалбаев

Қордай  ауданы, Қордай ауылы