Аудандық «Бәйдібек» мешітінде ауыл имамдарына арналған айлық дастархан ұйымдастырылып, барша жамағатқа арналған рухани шара өткізілді. Шара барысында «Мұсылмандар бірлігі» тақырыбында уағыз айтылып, қатысушыларға имандылық пен татулықтың маңызы кеңінен түсіндірілді. Бас имам қатысушыларға бірліктің қоғам үшін қаншалықты маңызды екенін айтып, әрбір мұсылманның өзара сыйластық пен бауырластықты сақтауға міндетті екенін жеткізді. Сонымен қатар, дәстүрлі ислам құндылықтары мен ұлттық салт-дәстүрдің үйлесімділігі туралы нақты мысалдар келтірілді.

Айлық дастархан барысында ауыл имамдары өздерін толғандырған сұрақтарын қойып, діни және әлеуметтік мәселелер бойынша тұшымды жауаптар алды. Имамдар жамағатқа уағыз арқылы бірлік пен мейірімділікті нығайту жолдарын көрсетті. Сонымен қатар, жастарды жат ағымдардың ықпалынан қорғау, отбасы мен қоғамда татулықты сақтау мәселелері де талқыланды. Дастархан басында барша қатысушыларға ізгі тілектер айтылып, ел амандығы мен мұсылмандар арасындағы берекелі қарым-қатынас үшін дұға жасалды. Шара соңында жамағат рухани азық алып, бірлік пен ынтымақты сақтау жолында ой толғады. Сонымен қатар, мұндай кездесулер ауыл имамдарының өзара тәжірибе алмасуына және бір-бірін қолдауына үлкен мүмкіндік беретіні айтылды.

Жамбыл аудандық орталық мешітінің баспасөз қызметі