Құмтиын ауылында ауыл имамы Қуаныш Исмаиловтың ұйымдастыруымен тазалық жұмыстары жүргізілді. Бұл шараның басты мақсаты – ауыл аумағын көріктендіру, қоғамдық орындарды таза ұстауға халықты бейімдеу болды. Имам қатысушыларға тазалықтың тек сыртқы келбет үшін емес, денсаулық пен рухани тәрбие үшін де маңызды екенін түсіндірді. Жұмысқа ауыл тұрғындары белсенді қатысып, мешіттің айналасы, мектеп жолдары және қоғамдық орындар жиналды. Сонымен қатар, жиналған қоқыстар арнайы орындарға шығарылып, қайта өңдеуге жіберілді.

Қуаныш Исмаилов ауыл тұрғындарына табиғатты таза ұстаудың, қоршаған ортаны қадірлеудің маңыздылығын айтып өтті. Аталған іс-шара жастарға да үлгі болып, олардың қоғамдық жауапкершілігін арттырды. Барлық қатысушылар бірлесіп жұмыс істей отырып, ауылдың көркі мен тазалығын қамтамасыз етудің қаншалықты маңызды екенін ұқты. Шара соңында имам барша қатысушыларға алғыс айтып, ел амандығы мен ауылдың бейбіт өмірі үшін дұға жасады. Сонымен қатар, тұрғындар осындай игі істерді тұрақты түрде өткізуге ниет білдірді.

Жамбыл аудандық орталық мешітінің баспасөз қызметі