Меркі аудандық «Меркі ата» мешітінде аудан ақсақалдарымен келелі кездесу өтті. Аудандық ардагерлер кеңесінің төрағасы Жылысбаев Байсейт Сабырұлы, аудандық билер кеңесінің төрағасы Өзбеков Медербек Көшенұлы, ардагерлер кеңесі төрағасының орынбасары Шолпанқұлов Ержан Диханалыұлы, "Мерейлі – Мерке" қайырымдылық қоғамдық қорының төрағасы Қалманбетов Жантұрсын, аудандық әкелер кеңесінің төрағасы Исақұл Асан аудан бас имамы Дәуіт Сейітқалиұлымен кездесуге мешітке келіп, ақ баталарын беріп, алдағы қызметіне сәттілік тіледі.

Кездесу барысында ел бірлігі, рухани тәрбие, ұлттық құндылықтарды сақтау және жас ұрпаққа өнеге көрсету мәселелері кеңінен қозғалды. Ақсақалдар өздерінің өмірлік тәжірибелерімен бөлісіп, дін мен дәстүр сабақтастығын нығайтудың маңыздылығын атап өтті.

Өз кезегінде Дәуіт Сейітқалиұлы құрметті қонақтарға ризашылығын білдіріп, ақ тілектеріне алғыс айтты. Сонымен қатар, кездесудің белгісі ретінде "Мұсылманның білуі тиіс 40 парыз" кітабын сыйға тартты.

Осындай тағылымды кездесулер – ұрпақтар сабақтастығын жалғап, әжелер мектебі мен ақсақалдар өнегесін дәріптеудің жарқын көрінісі.

Меркі аудандық «Меркі ата» мешітінің баспасөз қызметі