Анастан (Алла одан разы болсын) жеткен хадисте: «Алла Елшісі (оған Алланың игілігі мен сәлемі болсын) Мәдинаға келгенде, олардың екі мерекесі болатын. Пайғамбарымыз: «Бұл қандай күндер?» – деп сұрағанда, олар: «Жаһилия дәуірінде бұл күндерді ойын-күлкімен өткізетін едік», – деді.

Сонда Пайғамбарымыз (оған Алланың игілігі мен сәлемі болсын): «Алла Тағала осы екі күнді олардан да жақсы Құрбан айт пен Ораза айт мерекелерімен алмастырды», – деген. Осы мазмұндағы тағылымды хадис аясында Жамбыл облысы, Қордай ауданының бас имамы Азамат Берікұлы Айт намазына жиналған жамағатқа сүбелі уағыз-насихат айтты.

Ол өз сөзінде айт мерекесінің маңыздылығына тоқталып, мұсылмандарды бірлікке, бауырмалдыққа және ізгі амалдарға шақырды. Жиналған жамағатқа ақжарма тілектер айтылып, баршаның дұға-тілектерінің қабыл болуын тілеп, ел амандығы мен тыныштығы үшін бата жасалды. Айттарымыз берекелі, мерекеміз мерейлі болсын!

Аудандық «Қордай» мешіті баспасөз қызметі