Рамазан айы – жүректің күш-қуат алу, рухани әсерлену кезеңі деп түсіндірілген. Өйткені осы айда жүрек, күннің ыстығынан жылу алғандай, уағыздар мен терең ой-пікірлерден рухани толқыныс алады. Ораза – Ислам дініндегі негізгі рүкіндердің бірі. Ол самауи діндерден жалғасып келе жатқан құлшылық түрі болып табылады және адамның рухани, физикалық, денсаулық жағынан пайдасын тигізеді.

Осы орайда Қордай ауданы, Қордай ауылы, аудандық «Қордай» мешітінің наиб имамы Әнебеков Жанұзақ «Рахман» мешіті асханасында ауызашар кезінде ауыл тұрғындарына уағыз-насихат жүргізді. Насихат барысында қасиетті Рамазан айының мәні мен маңыздылығы, оразаның сауабы және жамағаттың бір-біріне мейірімділік көрсетуі туралы кеңінен айтылды.

Сонымен қатар тұрғындарға қасиетті айда игі амал жасау, мұқтаждарға қол ұшын беру және діни тәрбиені жетілдіру жайында маңызды мәліметтер берілді. Рамазан айындағы дұғалар, амалдар, ниеттер қабыл болсын!

Аудандық «Қордай» мешіті баспасөз қызметі