Жамбыл ауданы, Қызылқайнар ауылы "Бейсеу ата" мешітінің имамы Берсүгір Ермуханбет жиналған жамағатқа "Жат ағым жарға жығады" тақырыбында уағыз- насихат айтты. Қазақ халқы қашанда «Отан үшін отқа түс, күймейсің» деген даналық сөзді тәрбиенің негізі ұстанымдарының бірі ретінде ала отырып, әр баланы Отанды қорғау жолында барлық қиындықтарға төзе білуге баулып тәрбиелейді.

Дегенмен, соңғы жылдары елімізде Отан деген ұлы ұғымның қадір-қасиетінің парқына бармастан, оны қорғамақ түгілі, халықтың өзіне тән құндылықтары мен ұлттық болмысынан айырып, елдің тұтастығы мен қауіпсіздігіне қатер төндіретін теріс пиғылды ағымдардың әрекет жүргізіп отырғандығын байқаудамыз. Ниеті теріс мұндай ағымдардың негізгі мақсаты – ел халқының арасына іріткі салып, алауыздық тудырып, территориялық тұтастығымызға қол сұғу ғана. Жат ағым өкілдері діни ғұламаларды мойындамауымен қатар, ғылыми пікірлерін де жоққа шығарады.

Ғұламалардың көмегінсіз насихаттаймыз деп қателесіп, қоғамда көптеген кикілжіңдер туғызады. Сондықтан да әсіресе жастарымызды әртүрлі жат ағымдардың жетегінде кетуден сақтандыру үшін оларды жастайынан өзінің асыл дінін, төл тарихын, ұлттық құндылықтарын бойына сіңіріп өсуіне баса мән беру өте маңызды. Оларды отансүйгіштікке, патриоттыққа, адамгершілік қасиеттерге баулып, жалған құндылықтардан аулақ болуға тәрбиелеуіміз қажет.

Жамбыл аудандық орталық мешітінің баспасөз қызметі