"Әл ‑ Фирдаус" мешітінің имамы Бекболат Мыңбаев қасиетті Рамазан айының кіруіне байланысты жамағатқа арнайы насихат жүргізді. Бас қосу барысында имам Рамазан айының мұсылман қауымы үшін орны ерекше екенін атап  өтіп, бұл ай - сабыр мен шүкіршіліктің, кешірім мен мейірімнің, рухани жаңарудың айы екенін жеткізді.

   Имам өз сөзінде Рамазан - нәпсіні тәрбиелеп, тақуалықты арттыратын ерекше мүмкіндік екенін айтып, жамағатты оразаны шынайы ықыласпен ұстауға, тарауық намаздарына қатысуға және мұқтаж жандарға қол ұшын созуға шақырды.

   Насихат барысында Қасиетті Құраннан аят келтірілді: «Ей, иман келтіргендер! Сендерге бұрынғыларға парыз етілгендей ораза парыз етілді. Әрине, тақуалық етулерің үшін» ("Бақара" сүресі, 183 – аят).  Сондай - ақ имам Рамазан айында жасалған әрбір ізгі амалдың сауабы еселеніп жазылатынын айтып, ауызбіршілікті нығайтып, көркем мінез қалыптастырудың маңыздылығына тоқталды. Ол жамағатты уақытты тиімді өткізіп, Құран оқуға, дұға - тілекті көбейтуге үндеді.

   Жиын соңында жамағат ел тыныштығы мен бірлігі үшін дұға жасап, қасиетті айды лайықты деңгейде өткізуге ниет білдірді.