Меркі ауданында әйелдер жамағатының қатысуымен қасиетті Құран Кәрімді толық оқып аяқтауға арналған хатым дұғасы жасалды. Бұл игі шара – жамағаттың Құранға деген сүйіспеншілігі мен ықыласының, сондай-ақ рухани бірлігінің айқын көрінісі болды.

Іс-шара барысында жамағат мүшелері Құран аяттарын оқып, оның сауабын барша мұсылман үмбетіне, дүниеден өткен ата-бабалар мен жақындарының рухына бағыштады. Құран – мұсылманның өмірлік шамшырағы, тура жолға бастаушы қасиетті кітап екені насихатталып, оны оқу мен амал ету әрбір мүмін үшін үлкен нығмет екені айтылды.

Хатым дұғасы кезінде жүректер жұмсарып, жамағат ерекше рухани күйді сезінді. Қатысушылар Алладан елге тыныштық, отбасыға береке, жүректерге иман нәсіп етуін тілеп, шынайы дұға жасады. Сонымен қатар, Құранмен байланысты үзбей, оны күнделікті өмірдің ажырамас бөлігіне айналдырудың маңыздылығы еске салынды.

Бұл басқосу әйелдер жамағатының рухани дамуына серпін беріп, бір-біріне деген бауырмалдық пен сүйіспеншілікті арттырды. Осындай игі шаралар арқылы жүректер нұрланып, иман күшейіп, қоғамда ізгілік пен мейірімнің арта түсетіні сөзсіз.

Алла Тағала оқылған Құран хатымдарын қабыл етіп, баршамызға оның шапағатына бөленуді нәсіп етсін.

Меркі ауданы Меркі ата мешітінің баспасөз қызметі.