Қайтыс болған кісілерді жақсылықпен еске алу – мұсылман баласының асыл міндеті. Марқұм иманды пенде болсын, күнәһар болсын, оларды игі сөзбен еске алып, дұға жасап, Құран оқу — сауапты әрі пайдалы амалдардың бірі.

Бұл жөнінде Ардақты Пайғамбарымыз (оған Алланың салауаты мен игілігі болсын): «Өлген кісілеріңізді жақсылықпен еске алыңдар», – деп өсиет еткен. Осы өнегелі өсиетті негізге алған игі бастама Қордай ауданында кең көлемде жүзеге асуда.

Аудан бойынша әйел-қыздар жамағатының ұстазы Эльмира Аманқожақызының ұйымдастыруымен қасиетті ай аясында Құран хатым оқу шаралары жүргізілуде. Бұл игі амал арқылы жамағат марқұмдардың рухына бағыштап Құран оқып, елдің амандығы, жұрттың тыныштығы, береке-бірлік үшін дұға жасауда.

Мұндай шаралар қоғамдағы рухани байланысты күшейтіп, ізгілікке жетелейді. Алла Тағала баршамыздың Өз разылығы үшін жасаған құлшылықтарымызды қабыл етіп, ниеттерімізге береке берсін!

Аудандық «Қордай» мешіті баспасөз қызметі