Қоршаған ортаны қорғау мен табиғатты жасылдандыруға бағытталған “Таза Қазақстан” жалпыұлттық акциясы аясында Танты баба мешітінде игі    іс - шара ұйымдастырылды. Аталған шара барысында мешіт ұжымы мен жамағаты  бірігіп, мешіт ауласында ағаш және сәндік тал көшеттерін отырғызды.

   Бұл бастаманың басты мақсаты - қоршаған ортаны көркейту, мешіт ауласын абаттандыру және ел арасында табиғатқа қамқорлық жасаудың маңыздылығын насихаттау.

   Шараға мешіт имамы мен жамағат өкілдері, жергілікті тұрғындар және жастар қатысып, өз қолдарымен тал отырғызуға атсалысты. Қатысушылар бұл істі сауапты амал деп бағалап, табиғатты аялау - әрбір мұсылманның парызы екенін атап өтті.

   Мешіт имамы өз сөзінде: “ Таза орта - таза қоғамның негізі. Әрбір ағаш - тыныс алатын өмірдің белгісі. Осындай шаралар арқылы біз болашақ ұрпаққа жасыл әлем қалдыруды мақсат етеміз,” - деп атап өтті.

   Шара соңында қатысушылар мешіт ауласын тазалап, егілген талдарға күтім жасау жоспарын белгіледі. Бұл бастама жыл сайын дәстүрге айналып, қаланың экологиялық мәдениетін көтеруге өз үлесін қоспақ.