Гродиково ауылы "Арынғазы" мешітінің бес шәкірті "әліппе " кезеңін аяқтап, әр мұсылманның түпнұсқасынан оқып білуі, үйренуі тиіс болған қасиетті Құран кітабын еркін оқып меңгеру сатысына өтті. Құран - адамзатты шексіз бақытқа жетелейтін, тура жол көрсететін, қияметке дейін өзгермейтін мәңгі мұғжиза.

Құран-соңғы пайғамбарлықтың дәлелі, ханиф (тура) діннің үні әрі Ислам шариғатының ата заңы. Құран оқыған адамның бүкіл болмысымен өзгергенін байқайсың. Ішкі дүниесіне үңіліп қарасаң оның рухани тазарғанын, жүріс-тұрысының өзгергенін көресің.

Құранға деген махаббат оны оқуға байланысты. Қасиетті кітапты оқу – ең ұлы ғибадаттардың бірі және Аллаға жақындататын төте жол. Әбу Умама риуаят еткен хадисте Пайғамбарымыз (с.ғ.с.): «Құран оқыңдар! Ол қиямет күні иесіне шапағат етеді», – деп басқа пайғамбарларға берілмеген шапағатты Құран иеленетінін білдірген.

Жамбыл аудандық орталық мешітінің баспасөз қызметі