Шу ауданына қарасты Далақайнар ауылында қуанышты оқиға орын алды. «Далақайнар» мешітінің жанынан халыққа арналған жаңа асхананың ашылу салтанаты ұйымдастырылды.

Салтанатты рәсімге ауданның бас имамы Алмас Кенжемолдаев арнайы қатысып, қызыл лентасын қиып, нысанды ресми түрде пайдалануға берді. Шара барысында дін мен дәстүр сабақтастығы жайлы тағылымды ойлар айтылып, қатымхананың ашылу мақсаты – ысырапшылдықтың алдын алып, ауыл тұрғындарының тұрмысына қолайлы жағдай жасау екені атап өтілді.

Қасиетті жұма күні өткен бұл жиында құрылыс жұмыстарына атсалысып, белсенділік танытқан ауыл жамағаттарына алғыс хаттар мен естелік сыйлықтар табысталды. Игі бастаманың жүзеге асуына жергілікті тұрғындар бір кісідей жұмылып, бірлік пен жанашырлықтың үлгісін көрсетті.

Ақ дастархан жайылып, ауылдың қариялары мен ақжаулықты аналар бата беріп, елдің амандығы мен бірлігін тіледі. Жаңа қатымхана – ауылдың рухани-мәдени тірегіне айналып, көпшілік үшін сауапты істің бастауы болары сөзсіз.

Шу аудандық «Жәми» мешітінің баспасөз қызметі.