Жамбыл аудандық орталық «Бәйдібек» мешіті жанындағы әйел-қыздар секторының ұстазы Жайна Бекназарованың ұйымдастыруымен «Әйел әлемі – әдемі» атты облыстық рухани кездесу өтті. Ерекше форматтағы басқосу өңірдегі барлық әйел ұстаздарды шәкірттерімен бірге біріктіріп, тағылымы мол насихат алаңына айналды.

Шара барысында ұстаздар мен жамағат бір-бірімен танысып, әрбір ұстаздың өзіне тән сөз саптау мәнерімен, көркем насихатымен сусындап, рухани кемелдікке жетелейтін мазмұнды уағыздар тыңдады.

Кездесудің басты мақсаты – әйелдер арасындағы рухани байланыс пен ынтымақтастықты арттыру, ұлттық құндылықтарды насихаттау. Шараға қатысушылар ұлттық нақыштағы киім үлгілерін киіп келді. Дресс-кодқа сай, ең әдемі де сәнді ұлттық киім киген екі қатысушы арнайы марапатталып, бағалы сыйлықтарға ие болды.

Жайна ұстаз қорытынды сөзінде:
– Ананың басты міндеті – баласына ұлттық тәрбие беру, ана тілі мен салт-дәстүрді бойына сіңіру. Жер бетіндегі әрбір әйел ана болу бақытын сезінсе деймін. Әйел – баласымен әдемі, перзентімен көрікті. Бұл бақыттан ешбір қыз бала құр қалмаса екен. Кемел әйелдің сөзінде – даналық, рухында – нәзіктік пен тазалық, ал адамдармен қарым-қатынасында – құрмет пен сыйластық болуы тиіс, – деді.

Шара жамағаттың көңілінен шығып, әйелдер секторының қызметін жандандыруға тың серпін берді.

Жамбыл аудандық орталық мешітінің баспасөз қызметі