Жамбыл облысы Байзақ аудандық «Байзақ баба» мешітінің наиб имамы Бақытбек Бауыржанұлы Көкөзек ауылдық «Жантай ата» мешітінде V аймақ имам-молдаларына «Қоғам дерттері» тақырыбында дәріс оқыды.

         Бақытбек Бауыржанұлы дәрісінде: «Қазіргі уақытта жеке адамға және бүтіндей қоғамға қатер тудырып отырған дертті мәселелердің бірі – зиянды әдеттерге тәуелділік. Оның салдары күнәлі істердің жасалуы, қылмыстың көбеюі, отбасындағы берекетсіздік, бірліктің ыдырауы сияқты мәселелерге әкеліп соғуда.

Адам баласын құрдымға жіберетін үш апат (темекі тарту, ішімдік ішу, нашақорлыққа бой алдыру) бар десек,  бірі – нашақорлық һәм есірткіге әуестік. Есірткі қолданатын адам Алла Тағаланың бұйрықтарына бағынбайды, орындауы керек парыздарды орындамайды, күнә істеуден қорықпайды. Мұның ақыры дінді сақтамауға, ақыреттегі нығметтерден мақұрым қалуға алып барады. Сондай-ақ есірткі адамның санасын улап, денсаулығына зиян берумен қатар, өзіне тәуелді етіп, ақыры өлімге алып келеді.

Алла Тағала қасиетті Құранның «Мәида» сүресінің 90-91-аяттарында: «Уа, иман келтіргендер! Шындығында шарап, құмар ойын, пұттар, көріпкелдік жасайтын жебелер – шайтанның істеріне жатады. Сондықтан да олардан сақтаныңдар, сонда құтыласыңдар! Расында шайтан шарап пен құмар ойындар арқылы сендердің араларыңа от салып, дұшпандық пен жеккөрушілікті орнатуды, сендерді Алланың зікірінен, намаздан алыстатуды қалайды, сонда да тоқтатпайсыңдар ма?» – деп айтқан», - деді.