Жамбыл облысы Байзақ ауданының наиб имамы Бақытбек Бауыржанұлы II аймақ имам-молдаларымен кездесіп, «Жат ағымнан сақтану жолдары» тақырыбында семинар өткізді.

         Семинар барысында Бақытбек Бауыржанұлы: ««Жау жоқ деме,  жар астында» демекші,  жер бетінде қауып-қатер көбейіп тұрған кезде сақтанбауға және сақтандырмауға болмайды. Ел ішіне теріс пиғылды діни ағымдардың кіріп алғаны жасырын емес. Өзге ұстанымды уағыздайтын олар тұрғындарды ұлттық құндылықтарымыз бен болмысымыздан айыруды көздейді. Халқымыздың сан ғасырлық діни сеніміне, таным-түсінігіне, өнері мен салт-дәстүріне мүлде қарама-қайшы бұл індеттің қауып катері соншалық, баласы шешесінің қолынан ас ішпейтін жастар пайда болуда. Жат ағымның жетегінде жүргендер, қоғам үшін қай кезде де қауіпті.

Ислам - бұл тыныштықты бұзу үшін емес, теріс пиғылды тыю үшін жіберілген тәрбие діні. Ата-бабаларымыз да сан ғасыр бойы дәстүрлі дінді өмірлеріне негізгі діңгек етіп ұстанып, ауызбіршілікпен бейбіт ғұмыр сүріп келді. Бұрын жат ағымдар деген ұғым болмаған. Бар қазақ бір дінді, бір мазһабты ұстанып,  сенімі де, мақсат-мүддесі де бір болды», - деді.