Облыс бас имамы Асқар Сатылғанов Қордай аудандық "Қордай" мешітінде әйел-қыздар жамағатымен кездесуден кейін, ата-бабадан жалғасып келе жатқан "Тұсаукесер" дәстүріне қатысты. Салтанатты рәсім барысында имам тәй-тәй басып келе жатқан бүлдіршіннің тұсауын көпшілік алдында кесіп, оның болашағына ақ жол тілеп, дұға жасады.

Тұсаукесер рәсімі қазақтың ұлттық салт-дәстүрлеріне сай ұйымдастырылып, сәбидің таңдауына түрлі заттар ұсынылды. Бұл дәстүр оның болашақта қандай бағытта өсіп-жетілуіне деген ниет ретінде өткізілді. Жиынға жамағат өкілдері, аналар мен әжелер алқасының мүшелері қатысып, өздерінің ақ батасын берді.

Кездесу соңында ата-аналар ұйымдастырушыларға алғыстарын білдіріп, осындай рухани әрі ұлттық құндылықтарды дәріптейтін шаралардың көптеп өткізілуіне ниет білдірді.

Ақерке Бекқұлова,
"Һибатулла Тарази" мешітінің баспасөз қызметі