Жамбыл облысы Қордай ауданының аудандық «Қордай» мешітінде кезекті рухани шара өтті. Мешіт ұстазы Эльмира Аманқожақызының ұйымдастыруымен умра сапарына қатысушыларға сертификаттар табысталды. Бұл – биылғы жылдың қорытындысы бойынша умра сапарына жолдама алған төртінші лек. Қордай ауданында ұйымдастырылған бұл шараның мақсаты – жамағатты рухани тұрғыда біріктіріп, мұсылмандық міндеттерді орындауда ынталандыру.

Сертификатқа ие болғандар – Қордай ауданындағы әжелер алқасының құрметті мүшелері Айнагүл Аманғалиқызы мен Қаныткүл Асқарқызы. Олар қасиетті Меккеге сапар шегіп, умра ғибадатын орындауға ниеттеніп отыр.

Шара барысында ұстаздар мен жамағат апаларымызға ізгі тілектерін білдіріп, сәтті сапар тіледі. Жиналған қауым олар үшін дұға жасап, Алладан қабыл болған ғибадат пен аман-есен сапар тіледі. Бұл ерекше сәт жамағаттың жүрегіне жылы әсер қалдырды.

Эльмира Аманқожақызының айтуынша, мұндай сапарлар адамдардың рухани деңгейін көтеріп, ислам құндылықтарын тереңірек түсінуге ықпал етеді. «Бұл тек сапар емес, жүректің тазаруы мен иманның күшеюіне мүмкіндік беретін үлкен рухани тәжірибе», – деп атап өтті ұстаз.

Алдағы уақытта аудан мешіті осындай игі бастамаларды жалғастырып, қасиетті сапарларға қатысушылар санын арттыруды жоспарлап отыр.