Облыстық «Кеңесхан қажы» мешітіне 118 шәкірт қабылданды. Мешітке ұстазы Зейнеп Жәдігерқызы шәкірттерге  фиқһ, ақида, тәжуид бағыттары бойынша дәрістер беріп,  дәстүрлі діннің негізін түсінуге көмектеседі.

«Бұл пәндер шәкірттердің Ислам негіздерін терең түсініп, күнделікті өмірде қолдануына ықпал етеді. Қыркүйек айында қабылданған шәкірттер іріктеу тесттен өтіп, нәтижесі бойынша үздіктер келесі деңгейге өтуге мүмкіндік алды. Ал, сынақты тапсыра алмаған шәкірттер бірінші кезеңде білімін толықтыратын болады. Мешіт заман талабына сай жаңашылдықтарды енгізіп, заманауи технологияларды белсенді қолдануда. Шәкірттерге ыңғайлы болу үшін арнайы мобильді қосымша әзірленіп, тестілеу процесі онлайн форматқа көшірілді. Бұл қосымшаның арқасында шәкірттер тест тапсырып, нәтижелерін сол сәтте-ақ жылдам әрі оңай біле алады. Мұндай жаңашылдық білім беру үрдісін одан әрі тиімді әрі қолжетімді ете түсуде», – деген Зейнеп Жәдігерқызы «Кеңесхан қажы» мешітінде шәкірттер үшін барлық қолайлылық жасалғанын жеткізді.

Мешіт ұстаздары шәкірттерге тек білім беріп қана қоймай, олардың рухани дамуына да ерекше мән береді. Алдағы уақытта шәкірттердің оқу үлгерімін қадағалап, әрқайсысының білім алуына қажетті жағдай жасалмақ. Сонымен қатар, шәкірттер арасында түрлі шаралар ұйымдастырылып, олардың оқу үрдісіне қызығушылығын арттыру көзделуде.